Inkampani yeZupco isihanjiswe emthethwandaba yinkampani yezindaba iZimind Publishers ukuthi ibanjwe ngamandla ukuveza ukuthi yathenga njani amabhasi kusetshenziswa inkampani kaMnu. Kuda Tagwireyi.
Iphephandaba lobulembu ele NewsHawks lithi iZimind ibambane lenhlanganiso elwisa inkohlakalo, eye Transparency International ekukhwezweni kwaloludaba.
Umhleli wephephandaba le Zimbabwe Independent, uNkosazana Faith Zaba uthi basa loludaba emththwandaba ngemva kokutshelwa ngabaphathintambo ukuthi abazi ukuthi amabhasi la angamakhulu ambalwa athengwa njani ngoba kulobufakazi bokuthi ibhasi inye yathengwa ngamadola azinkulungwane ezingamatshumi afika phose isithupha, $58 000.
Kodwa iZupco yawathengiselwa ngamadola adlula amakhulu amabili, $212 962 kusetshenziswa inkampani ethiwa Landela Investment ekaMnu. Kuda Tagwirei.
Uhulumende wetheswa icala lokungethulelanga uzulu itender yokuthenga amabhasi la njengalokho okufunwa ngumethetho.
Ukuze sizwe ukuthi udaba lwama tender okuthenga impahla kahulumende ahanjiswa njani, sixoxe lengcwethi kwezenotho, uMnu. Masimba Kuchera.
