Umkhokheli webandla leMDC Alliance, uMnu. Nelson Chamisa osinde engozini yemota ngemva kokudutshulwa kwayo ngabantu abacatshangelwa ukuthi ngabasekeli bebandla leZanu PF eMutare ubikwa esecatshisiwe ngabebandla lakhe.
Ibandla leMDC alliance lithi imota ka Chamisa ibisedlula ku roadblock ebilabasekeli bebandla le Zanu PF kunye lamapholisa lapho okube lokukhulumisana kubi andubana uchamis lequla lakhe badlule ngesiqubu imota zabantu be Zanu PF zibahlezi esithende kwasukhaliswa imbhobho olunye uhlamvu lwatshaya ifastele lemota kaChamisa lwayathutsha kwelinye icele. Ngokutholakala kwenhlanhla uChamisa labakade besemoteni basinda.
Enye imota ebikhapha eka Chamisa ibikwa laye itshaywe ngolunye njalo uhlamvu lombhobho. Inhlanganiso ecwayisisa okwenzakala elizweni, eye Team Pachedu, ithi ihambise imfanekiso yabacatshangelwa ukuthi yibo abakade befuna ukubulala uChamisa emapholiseni kodwa litshone ilanga kungela loyedwa obotshiweyo.
Ngeviki edluleyo kube lesehlakalo esifanayo eMasvingo.
Ke sizwe amazwi omsekeli wesikhulumeli sebandla leMDC alliance, uMnu. Felix Magalela Mafa Sibanda:
Kodwa ibandla leZanu PF lithi okukhulunywa libandla leMDC Alliance akusiloqiniso. Isikhulumeli sikamongameli Emmerson Mnagwangwa, uMnu. George Charamba laye uthe akusiliqiniso okwenzakeleyo lanxa kulemfanekiso kamabonakude.