Ukubotshwa kwabalwa impi yenkululeko eHarare izolo ngesikhathi betshengisela phezu kwemali abayiholiswa nguhulumende besithi incane, kutshiye inengi limangele ngoba abasekeli beZanu PF abavamanga ukubotshwa lanxa bengaze betshengisele ezitaladeni ngaphandle kwemvumo.
Lanxa isikhulumeli samapholisa uMnu Paul Nyathi etshele iStudio 7 ukuthi ubengakatholi imbiko eneleyo ngodaba lolu, kubikwa kubotshwe abantu abangamatshumi amathathu.
Abalwa impi yenkululeko laba bathi iZ$16,000 abayitholayo ngenyanga ayibenelisi lutho. Ngokunjalo, bathi uhulumende kumele engezelele limali ngoba yibo abakhulula ilizwe.
Abanye bathi ukubotshwa kwabantu laba, inengi labo kungabasekeli beZanu PF, kungaba kuveza ukuthi sokulodonselana kunkokheli zebandla elibusayo. kodwa abanye bathi amapholisa enza umsebenzi wawo ngokufaneleyo.
Kuvame ukubotshwa abamabandla aphikisayo labalwela amalungelo kazulu nxa betshengisela. Sixhume ocubungula ezombusazwe uMnu Mthulisi Hanana.
