Obengumqondisi weqembu lomdlalo wenguqu elabasakhulayo eChicken Inn, uSimba Mutubuki, akasekho.
UMutubuki, obesaziwa kakhulu ngegama elokuthi Mkoma Simba, wedlule emhlabeni ngoLwesine ntambama elokitshini leNjube lapho abekade ehlala khona.
UMorris Mukwiti, sebenze laye kuqembu leNjube United elike ladlala kusigaba sika Divison 2 eminyakeni eyadlulayo, uthi umdlalo wenguqu ulahlekelwe kakhulu ngokubhubha kuka Mutubuki.
“Silahlekelwe kakhulu ngokufa kukaMkoma Simba Mutubuki. Ubeyinkokheli yomdlalo wenguqu njalo elelihlo lokubona abantwana abalesiphiwo somdlalo wenguqu.
“Ubesenza ukuba abantwana batshone bedlala ibhola bengatshoni esitaladeni bethatha izidakamizwa lokunatha utshwala kodwa betshone besenza ezemidlalo bethuthuka besiya phambili. Sibuhlungu kakhulu ngokutshona kukaMkoma Simba njalo silahlekelwe kakhulu thina abantu base Njube.”
UMutubuki uke wasebenza lamaqembu abalisa eleNjube Sundowns lona ebelidlala kusigaba saphezulu esePremier Soccer League, eleBoys Without, kanye lele Njube United.
Ngesikhathi esedlula emhlabeni ubesebenzela iqembu leChicken Inn lapho abengumeneja wamaqembu abafana abasakhulayo.
UCharles Dhiwayo, 0munye wabaqeqetshi beqembu labasakhulayo eleChicken Inn, uthi uMutubuki ubelothando olumangalisayo olomdlalo wenguqu.
“Ubelothando lomdlalo wenguqu okokuthi ubengafuni ukudliwa. Ububona nxa sinqobile ukuthi ubejabulela kakhulu abafana aze aphathe kuhle lalabo ebesidlala labo kunye labonompembe kodwa nxa sidliwe ubehlulukelwa kakhulu.
“Eyinye into ebikuye ubengumuntu okhuluma iqiniso ubengatshoni egudla iguma kodwa ubehle akulande akutshele ukuba lapha uyaphazamisa nxa uzonda uphele uzonde kodwa ngoba eyabe ekhuluma iqiniso kusasa kwakhona liyabe selizwanana.”
USiphambaniso Dube, umnikazi weqembu le Ajax Hotspurs, uthi uMutubuki ubekuzinga lika Ali Baba Dube ekuthuthukiseni umdlalo wenguqu edolobheni lako Bulawayo.
“Engingakutsho ngoMkoma Simba yikuthi uBulawayo ulahlekelwe kakhulu njalo nxa sesikukhangela simfaka ezingeni labantu abanjengabo Ali Baba lapha koBulawayo nxa sikhuluma ngokuphakamisa ibhola labafana abancane.
“Ubeyisiphoxo njalo ubetshiya abantu behleka ngezenzo zakhe kodwa ubezimisele kakhulu ekuthuthukiseni omntwana ongumfana ekudlaleni ibhola.
Silahlekelwe kakhulu njengoBulawayo njalo izakhamamizi zaseNjube kuzakuba nzima ukuthi zithole umuntu onjengoMkoma Simba.”
UMutubuki ubeseleminyaka engamatshumi ayisithupha lantathu eyokuzalwa njalo akukaziwa ukuba uzabekwa nini njalo ngaphi.