Amagqwetha eZimbabwe Lawyers for Human Rights aselobele usikomitshi wamapholisa uMnu Godwin Matanga ekhonona ngokuthi amapholisa kazinikelanga ukuqhuba uphenyo phezu kokudilizwa lokutshontshwa kwamatshe esikhumbuzo sabantu ababulawa yiGukurahundi eSilobela laseBhalagwe.
Amagqwetha la alobe lincwadi emela inhlanganiso yeIbhetshu Likazulu eyiyo eyafaka amatshe la. ESilobela yafaka ilitshe lokukhumbula abesilisa abalitshumi lanye abathathwa emizini yabo libutho leFifth Brigade mhlaka 30 kuZibandlela ngo1985 banyamalala kokuphela.
Lelilitshe latshontshwa kwaze kwaba kabili.
EBhalagwe yafaka kabili lalo latshontshwa kwathi elesithathu labhonjwa ngabantu abanakanelwa ukuthi basebenzala uhulumende lanxa yena uhulumende ekulandula lokhu.
Lanxa abe Ibhetshu LikaZulu bamangala, iZimbabwe Lawyers for Human Rights ithi akula lutho osolwenziwe ngamapholisa nanku kungela ngitsho loyedwa osebotshiwe.
Ithi ukutshontshwa lokudilizwa kwamatshe lawa kuhlukumeza abantu ababulawelwa izihlobo yiGukurahundi.
Ngokunjalo, ithi uMatanga kumele abone ukuthi amapholisa aqhuba uphenyo kubotshwe labo abawatshontshayo.
Sixoxe lesiphathamandla seIbhetshu LikaZulu uMnu Mbuso Fuzwayo.
