Umphathintambo kahulumende obona ngezikolo zemfundo ye-primary, uDokotela Evelyn Ndlovu, uthi uhulumende usemise okwesikhatshana umsebenzi ababalisi bonke abakhalala umsebenzi bekhonona ngeholo eliphansi.
UDokotela Ndlovu wethule umbiko lo namuhla esithi bonke abakhalala umsebenzi kumele bengahambi emsebenzini phakathi kwenyanga ezintathu njalo kabasoze bethole iholo.
Uthe akumelanga bonke abamiswe umsebenzi bengenele kudaba lolu oluphenywa nguhulumende.
Uthi abephula umthetho bazajeziswa ngemfanelo nguhulumende ofisa ukuba kusetshenzwe ngemfanelo kuhlangothi lwezemfundo.
Kodwa okhokhela inhlanganiso yababalisi eyeProgressive Teachers’ Union of Zimbabwe, uMnu. Raymond Majongwe, uthi uhulumende kumele adlelane kahle lababalisi lezinye izisebenzi.
Uthi phakathi kwababalisi abedlula inkulungwane ezilikhulu lamatshumi amahlanu – 150,000 kuzamiswa umsebenzi abedlula inkulungwane ezilikhulu lamatshumi amathathu – 135,000.
UMajongwe, owethule umbiko lo enkundleni yokuxhumana eyeTwitter, uthi lokhu kufana lokuvala ngci izikolo.
Lokhu kusekelwa nguSikhwicamfundo Lovemore Madhuku othi uhulumende kalamvumo yokuxotsha umsebenzi ababalisi ngoba bephansi kohlangothi lwePublic Service Commission.