amalinks wokungena

Breaking News

Ababalisi Baphanyeka eHigh Court Udaba Lokumiswa Kwabo Okwesikhatshana Umsebenzi Nguhulumende


Abanye abantwana sebezifundela bodwa behlezi ngaphansi kwezihlahla kulandela ukuvalwa kwezikolo. Ababalisi bakhalala umsebenzi bekhonona ngeholo eliphansi (Columbus Mavhunga/VOA)

Abenhlanganiso yababalisi eyeAmalgamated Rural Teachers Union (ARTUZ) bathi amagqwetha abo asebenza phansi kwenhlangaiso yeZimbabwe Human Rights NGO Forum asekhweze udaba emthethwandaba weHigh Court ngesiphangiphangi lokuphikisa ukuxotshwa kwabanye ababalisi umsebenzi nguhulumende.

Lokhu kuza ngesikhathi abogatsha lwezemfundo yePrimary leSecondary bemise ukusebenza kwababalisi abangazange baye emsebenzini kusukela izikolo zivulwa mhlaka 7 Nhlolanja besithi kabasoke bahole okwenyanga ezintathu ezilandelayo.

Embikweni wokumisa umsebenzi ababalisi laba, awethulele intathelizindaba izolo, umphathintambo wogatsha lwezemfundo, uNkosikazi Evelyn Ndlovu, uxwayise ukuba akumelanga kuphazanyiswa ukusebenza kwezikolo yilabo abakhalala imisebenzi.

UNkosikazi Ndlovu, ongathandanga ukuphendula imibuzo yentathelizindaba uthe lumbiko uvela kumongameli welizwe.

“Kuzothathwa amanyathelo afaneleyo nalo alukhuni kulabo abazatholakala bengabavimba abanye babo lapho beqhuba umsebenzi wabo wokufundisa.”

UMnu. Musa Kika, umqondisi wenhlanganiso yamagqwetha amela abeARTUZ eyeZimbabwe NGOForum, uthi bakubone kumqoka ukuba besize ababalisi besenzela ukuthi sigenqulwe leso sinqumo sokuhlukunyezwa kwababalisi ngumqhatshi.

Isikhulumeli seARTUZ, uMnu. Thembakuye Moyo, akathandanga laye ukuveza okunengi ngodaba lwabo asebelukhweze edale.

“Sikhangele indlela okuphilisanwa ngayo kuleli lizwe, umqhatshi lezisebenzi, sikubona kungabalulekanga siveze ukuba siya kuyiphi i-Court, lokuba ngubani osimeleyo. Onguye esimhlaselayo e-Court nguye ozaba kwazi ukuthi kumele aqonde kuyiphi i-Court njalo uzohlangana lobani.”

Inengi labazali abagoqela uMnu. Solomon Mguni bathi kubuhlungu okwenzakalayo kumfundo yabantwana loba kulilungelo lababalisi kuba bekhalale umsebenzi nxa bekhahlanyezwa kumbe bengaholiswa kahle nguhulumende.

“Imali abayitholayo, incane. Labo bafuna imali ezabenza baphile ngoba ungananzelela i-fees zikhwelile, yena utitsha laye nxa elabantwana bakhe abafundisayo, ukuthi bafunde labo, kusuka kube nzima ngoba imali abayitholayo incane kakhulu.”

Ingcwethi ezicubungula ezomthetho zithi inyathelo likahulumende lokumisa umsebenzi ababalisi ngoba bekhalaza ukuthi iholo aleneli, liphambana lemithetho yelizwe njalo lephula ilungelo loluntu.

Ababalisi baqina ngelokuthi bazobuyela kuphela emakilasini ukuyafundisa uma uhulumende engabuyisela iholo labo kulokho elaliyikho khona ngomnyaka ka2018 lamadola eMelika aphezu kwamakhulu amahlanu - USD$540.

Imizamo yokuzwa ukuthi bathini abezinye inhlanganiso zababalisi ezinjenge Progressive Teachers Union of Zimbabwe leye Zimbabwe Teachers Association - ZIMTA kuloludaba, yehlule ngoba abaphathintambo bazo bebengaphenduli omakhalekhukhwini.

Facebook Forum

XS
SM
MD
LG