amalinks wokungena

Breaking News

Bathwele Nzima Abangela Zithupha Abafisa Ukubhalisela Ukuvota


Banengi abantu abangelazithupha abafisa ukubhalisela ukuvota kukhetho oluzakwenziwa ngomnyaka ozayo. (S. Mhofu/Sept. 2017)

Abatsha abanengi esigabeni seNtabazinduna leMbembesi esabelweni seMatabeleland North bathi kabenelisi ukubhalisela ukuvota ngoba kabalazithupha. Kulabanye njalo abathi akuncedi lutho ukuvota eZimbabwe.

Abehluleka ukubhalisela ukuvota batshele umsakazo weStudio 7 ukuba abavunyelwa yiZimbabwe Electoral Commission ukubhalisela ukuvota ngoba kabalazithupha. UNkosazana Gillian Ngwenya, oleminyala yokuzalwa elitshumi lesitshiyagalombili - 18 wehlulekile ukubhalisela ukuvota.

"Angikathathi isithupha … isithupha sikababa yiso esingenza ngehluleke ukuthatha ibirth certificate. Bathi ngibuye lesithupha somzali wami."

UMnu. Taurai Nyandoro uthi kwehlule ukuba athathele umzukulu isithupha ukwenzela ukuba abhalisele ukuvota.

"Abantu sebekhathele because akula lutho olutshintshayo, loba bengavota abanye sebefake izikhali ngoba loba bengavota akulatshintsho, akula nguquko vele enzakalayo lokhu kufana nje."

UNkosazana Anele Sdambe sowake wavota. Ukhuthaza abantu ukuthi bebhalisele ukuvota.

"Ukuregister ukuvoter angikayikhona kodwa bebethe kuyaqalisa namuhla esigabeni sakithi ngapha but last time kuvotwa ngangi register kutshukuthi maybe sengizahamba ngiye checker igama lami ukuthi lingabe likhona yini. Okungenza ukuthi ngivote yikuthi ukuvota ngiyazwisisa ukuthi kulilungelo lami ukuthi ngikhethe inkonkeli ezangikhokhela elizweni lakithi."

UMnu. Nhlanhla Ncube, oleminyaka engamatshumi amabili lane - 24 njalo oyintandane, kalazincwadi zokuzalwa.

"Iproblem yisithupha lokuthi angila bazali. Ngazama ukuthi ngichecke emawofisini bathi akwenzi, ngizwa ubuhlungu, empilweni ngizihlalele akula lutho engilwenzayo."

UMnu. Richard Moyo, uphathintambo kahulumende obona ngokwenzakala esabelweni seMatabeleland North njalo elilunga lephalamende elimele uMguza lapho okulisiqinti seNtabazinduna, uthi abantu kabahambe bayebhalisela ukuvota.

"Sebekwanisa ukuthi benga register labo abalezithupha. Labadala abanye ababenga registanga iskhathi sonke lesi khathesi uhulumende se roller out uhlelo lokuthi kuregistwe ukuvota, ukuze abantu ngo 2023 beye exerciser ukuvota ilungelo labo ngokuthi bevote."

UMoyo ugcizelele esithi abantu bazaphiwa esinye isikhathi sokuthatha izithupha lokubhalisa ukuvota kuze kuyefika ukhetho luka 2023.

"Kuzaba laba mobile registration, okuyabe kuthathwa khona abangela ama birth certificate bethatha ama birthcerificate abangela zithupha bethatha uzithupha bahle baregiste ukuvota khonapho ngoba uhlelo lolu olokuregister ukuvota yi ongoing up to 2023, so siyakhuthaza ukuthi umntwana nxa sokwenziwe konke lokhu sehambe waya register wathatha isithupha sakhe kufuze ahle aregiste lapho ayabethathe khona isthupha"

Inengi labatsha endaweni phose zonke zeZimbabwe zikhala ngokuswela izithupha ukuthi bebhalisele ukuvota kuhlelo lweZEC olwenzakalayo ngalesikhathi eZimbabwe yonke jikilele.

Facebook Forum

XS
SM
MD
LG