amalinks wokungena

Breaking News

Ibandla likaChamisa Lithi Abasekeli Balo Babotshiwe Babhaxabulwa Ngamapholisa eHarare


Emhlanganweni wabebandla leCCC lentathelizindaba eHarare

WASHINGTON DC - Ibandla likaMnu Nelson Chamisa eleCitizens Coalition for Change (CCC) lithi kubotshwe abasekeli balo abalitshumi lantathu, 13, batshaywa kakubi ngamapholisa ngesikhathi bekhankasela ukhetho eHarare ngoLwesihlanu.

Isikhulumeli salelibandla uNkosazana Fadzayi Mahere - eloba enkundleni yeTwitter - uthe abantu laba betheswa icala lokubangela udlakela. Uthe kuyamangalisa lokhu ngoba abazange benze udlakela kodwa bebezikhankasela besezimoteni.

Ibandla leCCC lethule i-video etshengisa amapholisa ebhaxabula abantu elithi ngabasekeli babo laba ababotshiweyo. Le yinto esolwe kakhulu nguChamisa esithi lobu yibudlova obumele buqedwe nguMongameli Emmerson Mnangagwa.

"Mnu ED lokhu yikuganga, yibudlova obungekho emthethweni. Cabanga kunguwe kumbe abantwabakho abahlukunyezwa kanje," kutsho uChamisa eloba kuTwitter. "Ukusebenzisa udlakela ebantwini kubi kakhulu, yibudloba. Akulalutho olungapheliyo."

Abasekeli beCCC laba bamelwa ngamagqwetha enhlanganiso yeZimbabwe Human Rights NGO Forum, yona ethi bebevalelwe enkambeni yeHarare Central ngezikhathi zantambama.

Isikhulumeli samapholisa uMnu Paul Nyathi wethule umbiko ngemva kokubotshwa kwabasekeli bakaChamisa esithi "amapholisa akhathazekile ngemva kokunanzelela ukuthi kulabanye abezombusazwe labasekeli babo abenza imihlangano besezimoteni (car rallies). Ngokwenza njalo basuke bavale imigwaqo emadolobheni lakwezinye indawo ezigcwala uzulu.

"Phansi komthetho weMaintenance of Order and Peace Act, Isahluko 11:23, abaqoqa imihlangano kumele bayenzele lapho abayabe bephiwe khona imvumo ukuthi bayiqhubele ukuzi bengaphazamisi ukuthula."

Kusenjalo, kuzaba kuphithizela ngempelasonto amabandla ezombusazwe ekhankasela ukhetho.

NgoMgqibelo umholi weMDC-T uMnu Douglas Mwonzora uzakwenza umhlangano koBulawayo kuthi ngeSonto uChamisa abe lowakhe eHarare. Ibandla leZanu PF lalo lizakuba lomhlangano eMarondera ngosuku olufanayo.

Ingcwethi kwezombusazwe uMnu Effie Dlela Ncube utshele iStudio 7 ukuthi iyasolisa indlela amapholisa aphatha ngayo abasekeli bakaChamisa nxa kuqathaniswa labeZanu PF.

please wait

No media source currently available

0:00 0:02:45 0:00

Facebook Forum

XS
SM
MD
LG