amalinks wokungena

Breaking News

Amabutho eRussia Asehlasela eleUkraine, uPutin Uthi Amanye Amazwe Engalokithi Angenele


RUSSIA-UKRAINE-CONFLICT

WASHINGTON DC - EleRussia seliqalisile ukuhlasela eleUkraine.

UMongameli walelolizwe uMnu Vladimir Putin wethule umbiko emadabukakusa ngoLwesine esithi uthumele amabutho esigabeni seDanbos, kweleUkraine, lapho athi ulande ukuyavikela abahlali baleyondawo abagoqela izizalwane zelizwe lakhe.

Uxwayise amazwe omhlaba ukuthi engalokothi angenele kulimpi, esithi ozangenela uzazibona izibunu zenyoka.

UPutin uqale limpi ngesikhathi ugatsha lweUnited Nations Security Council luqhuba umhlangano eNew York, eMelika, phezu kwaloludaba, lapho unobhala jikelele weUN labanye abaxwayise eleRussia ukuthi lingaze lahlasela eleUkraine.

UMongameli weMelika uMnu Joe Biden wethule umbiko esola kakhulu uPutin.

Uthe uzabiza umhlangano wamazwe akumanyano weG7 namuhla lapho athe bazakwethesa eleRussia izijeziso zenotho ezilukhuni.

Amazwi kaBiden aza ngesikhathi inengi lezizalwane zeMelika lisithi lelilizwe akumelanga lidlale indima ebanzu kudaba lolu.

Uphenyo olwenziwe yiAssociated Press ibambene leCenter for Public Research Affairs luveza ukuthi abantu abayisilinganiso samatshumi phose amathathu, 26 percent, yiso kuphela esithi iMelika kumele idlale induma enkulu kudaba lweRussia leUkraine.

Isilinganiso sokungamatshumi amahlanu lambili, 52 percent, sithi kumele ibambe iqhaza elincane kuthi isilinganiso samatshumi amabili, 20 percent sithi akumelanga iMelika ingenele.

Facebook Forum

XS
SM
MD
LG