Abadabuka eZimbabwe abafunda kwele Ukraine bacela ukususwa kwele Ukraine ngokutshetsha kulandela ukuhlaselwa kwelizwe leli ngele Russia.
Izifundi lezi ezedlula amatshumi ayisithupha – 60 ezisedolobheni leVinnytsia, entshonalanga kwesigodlo selizwe leli iKyiv, zithi zethuswa yimpi le elakho ukuqhamuka elizweni lonke. Iziphathamandla zakwele Zimbabwe zithi bonke abakwele Ukraine kumele bexhumane lesigodlo selizwe kwele Germany.
IReuters News Agency ibika ukuba kulabantu abedlula amatshumi amane – 40 asebebulewe libutho lakwele Russia elibhomba endaweni zonke zelizwe.
Abanye abantu kubikwa ukuba sebecatshe endaweni zokuzivikela – amabunkers njalo kulabanengi kakhulu abazama ukubaleka kulelolizwe loba izimota sezisehluleka ukuphuma emadolobheni ngenxa yokuminyana.
UMongameli Joseph Biden wakwele Melika uthi uPutin wenza ihlazo njalo uzafakelwa ezinye izijeziso zenotho.
Umkhokheli wakwele Russia, uMnu. Vladmir Putin, uthi uzajezise ozangenele empini le. UPutin kafuni ukuba eleUkrain lingene kunhlanganiso yeNorth Atlantic Treaty Organization. Inhlanganiso ebongo ngokwenzakala emhlabeni wonke jikelele eyeUnited Nations ithi kubi kakhulu okwenziwa nguPutin, osebenzisa amabhomba esabekayo kwele Ukraine.
Inhlanganiso le ithi uPutin kukhanya engani ufuna ukuhluthuna intambo zombuso kwele Ukraine afake esikhundleni abantu abadlelana labo kahle.
Kusenjalo, uVincent Siziba, odabuka eZimbabwe ofunda kwele Ukraine, uthi sebefuna ukuphuma kulelolizwe ngokutshetsha.