amalinks wokungena

Breaking News

Abanye Abafunda Kwele Ukraine Sebezama Ukuyaphephela eRomania


Abanye abantu ababaleka kwele Ukraine abayaphephela kwamanye amazwe. (AP)
Abanye abantu ababaleka kwele Ukraine abayaphephela kwamanye amazwe. (AP)

Abanye abadabuka eZimbabwe abafunda endaweni ezitshiyeneyo akade bezimisele ukuhlala kwele Ukraine, loba kulempi eyesabekayo, bathi sebecabanga ukuya eRomania lakwamanye amazwe. Kulabanye njalo asebesukile kulelolizwe baya phephela kwele Poland.

Izifundi esezicabanga ukusuka kwele Ukraine elihlaselwa ngele Russia zithi zethuswa yimibiko kahulumende ethi kulabantu abafika phose amakhulu amabili – 198 asebebulewe kusukela ngesikhathi kuqhamuke impi le.

EleRussia kukhanya selibomba indawo ezinengi kulandela ukudubulana okwesabekayo lamasotsha edolobheni elikhulu eKyiv.

IReuters ibika ukuba uMongameli Volodymyr Zelenskyy wakwele Ukraine usedolobheni leli lapho akhuthaza abantu bonke ukuba belwisane lebutho leRussia besebenzisa imibhobho lokunye abangakuphekapheka ezindlini zabo. Walile namuhla ukuthuma abantu kwele Belarus lapho eleRussia elifisa ukuba kwenziwa umhlangano wokukhulumisana ngokwenzakala kwele Ukraine.

UMnu. Vladmir Putin wakwele Russia ufisa ukuba umhlangano lo wenzelwe kulelolizwe. Kodwa uZelensky uthi kumele wenzelwe edolobheni leWarsaw kwele Poland. EleRussia okwamanje lizama ukuhluthuna isigodlo lesi lamanye amazwe lisebenzisa imibhobho emkhulu ehaza inhlambu.

UZelensky uthi okwenziwa ngele Russia kwephula imithetho eyethulwa yinhlanganiso yomhlaba wonke jikelele eyeUnited Nations ngakho abakwenzayo kulihlazo. Lokhu kwethusa labadabuka eZimbabwe abafunda kwele Ukraine.

ULaison Moyo, ofunda eVinniystia National Medical University, uthi laye usefuna ukusuka kwele Ukraine njangabanye abasanda kuhamba kwele Poland.

Uyakhala uMnu. Collins Ncube wakoBulawayo ngokwehlele izizalwane zeZimbabwe ezifunda kwele Ukraine.

Abasuke ngeviki ephelileyo kwele Ukraine kubikwa ukuba bamukelwe yinhlanganiso yeDiaspora Network esebenzela kwele Germany.

Bahlangabezwe ngabanye babo abahlala ePoland. Bazathenga amatikiti bebuyele ekhaya. Kusenjalo, banengi abantu abathi eleRussia leleUkraine kumele bekhumisane umlotho kungakabulawa abantu abanengi kakhulu.

UMnu. Marvelous Khumalo, okunhlanganiso yeHarare Metropolitan Residents Forum, ngomunye wabalombono lo.

Lokhu kusekelwa nguMnu. Dumezweni Nyathi othi impi le ingacina ingenelwa ngamazwe akumanyano weNorth Atlantic Treaty Organization.

Uhulumende wakwele Zimbabwe uthi zonke izifundi ezifisa ukusuka kwele Ukraine kumele zikhulume leziphathamandla zelizwe eZimbabwe Embassy kwele Germany.

XS
SM
MD
LG