amalinks wokungena

Breaking News

Ziyalibhedela Iqembu Lenguqu eleBosso Lonyaka


Highlanders Football Club team of 2022

Ahlangane lembila zithutha ngempelaviki eyedluleyo amaqembu omdlalo wenguqu amakhulu elizweni abalisa iHighlanders, Dynamos leCaps United.

Iqembu likamasipala wedolobho lako Bulawayo ele Bulawayo City lephule inhliziyo zabalandeli beqembu le Highlanders ngeSonto ngokunqoba abakwenze nge 1 ka nya.

Umqeqetshi weqembu lenguqu ele Bulawayo City, uPhilani Ncube
Umqeqetshi weqembu lenguqu ele Bulawayo City, uPhilani Ncube

Ekhuluma lentatheli zemidlalo ekupheleni komdlalo umqeqetshi weqembu le Bulawayo City uPhilani Ncube utshayele ihlombe abafana bakhe ngokunqoba kwabo okwakuqala selokhu kuqale imidlalo yeligi.

“Vele kukhona lapho obekumele siqalele khona ukunqoba njalo ukudlala leqembu le Highlanders kuvele kuyinkuthazo khona ngokwakho.

Sisiya phambili kumele sisebenze gadalala ngoba lokhu sisesimeni esingekho sihle. Kuzamele nxa sidlala singekho ngekhaya sithole umklomelo loba owodwa kodwa nxa singekhaya kumele siyithathe yonke yomithathu,” kutsho uNcube.

Phambilini komdlalo wangeSonto iqembu le Bulawayo City belinqotshwe emidlalweni emithathu laba ngutshiki lobhanqa kowodwa.

Impumela yangeSonto ilitshiye selingutshiki lobhanqa ngemiklomelo emine lele Highlanders njalo lokhu sekudale ukuba abanye abalandeli be Bosso baqale ukukhonona ikakhulu ebulenjini.

Umqeqetshi we Bosso uMandla Mpofu
Umqeqetshi we Bosso uMandla Mpofu

Loba kunjalo umqeqetshi we Bosso uMandla Mpofu uthi kusasemasinya ukuba usengahle axotshelwe ukwehluleka.

“Sekungenzeka loba yini kodwa mina kunengi esingehlangane lakho emdlalweni webhola. Loba yisiphi isinqumo esingathathwa siyabe siphezu kwamandla ami njengomqeqetshi okokuthi akula engingakwenza kodwa ngokubona kwami kusasemasinya,” kutsho uMpofu.

Iqembu le Highlanders lihlezi endaweni yetshumi lantathu engalaneni yemiklomelo kusithi ele Bulawayo City lona lisendaweni yetshumi lanhlanu.

NgoMgqibelo iqembu le Bulawayo Chiefs lehluleke ukuthola yonke imiklomelo emithathu ngemva kokuba ngutshiki lobhanqa 0 ka 0 le Tenax.

Umqeqetshi walo uNilton Terroso kusamele balungisise okumbalwa ukuze bayenelise ukuncintisana lamanye amaqembu

“Lesi yisibonelo esokuba silomsebenzi ongakanani okumele siwenze ukuze sibe kuzinga linye lamanye amaqembu ahlezi enqoba njalo ahlezi phezu kwengalane.

Kimi kutshengisa ukuba kusamele sikhweze amasokisi njengoba bengivele ngisitsho kumaviki adluleyo,” kutsho uTerroso.

Phezu kwengalane kuhlezi iqembu le Manica Diamonds lona elibhuqe ele Caps United nge 6 ka 2 njalo elilemiklomelo elitshumi lambili.

Endaweni yesibili kuleqembu le Chicken Inn lona elitshaye ele Dynamos nge 1 ka nya njalo lalo lilemiklomelo elitshumi lambili.

Iqembu le Herentals yilo elihlezi endaweni yesithathu lilemiklomelo elitshumi njalo ngempelaviki eyedluleyo litshaye ele Whawha nge 3 ka nya.

Iqembu le Whawha yilo elihlezi emsileni wengalane lilemiklomelo emibili.

Ezemidlalo siloJoseph Njanji
please wait

No media source currently available

0:00 0:02:21 0:00

Facebook Forum

XS
SM
MD
LG