WASHINGTON DC - Ibandla leCitizens Coalition for Change (CCC) selisole kakhulu ukuhlukuluzwa kwamalunga emuli yomsekeli walo, uMnu Mboneni Ncube, yena obulawe ngabantu abacatshangelwa ukuthi yizikliwi zeZanu PF eKwekwe ngeSonto.
Udadewabo kamufi, uNkosazana Judith Ncube, utshele iStudio 7 ukuthi bathe bebuthene esililweni izolo bahlaselwa ngamadoda amane anakanelwa ukuthi ngabacuphi bakahulumende, amaCIO, wona ekade ehamba ngezimota zohlobo lweIsuzu ezingela ma-number plates.
Uthi abesilisa laba baxotshe umuntu wonke endlini, okugoqela umfelokazi, besithi bagqokeneli impahla ezilithanga, okungumbala webandla leCCC, njalo besithi yibo asebekhokhela uhlelo lokubekwa kukaNcube.
Bathe njalo sebethatha isidumbu sakhe. Le yinto esolwe kakhulu ngumsekeli wesikhulumeli seCCC uMnu Felix Magalela Mafa Sibanda esithi leli lihlazo.
Lelibandla lithi isidumbu sikaNcube sizahlolwa zingcwethi kusasa, i-postmortem ngesiNgisi, ebesebekwa eNyama Business Center, eLower Gweru ngoLwesihlanu.
UNcube, yena otshiye umkakhe asanda kumthatha lengane eleminyaka eyisitshiyangalombili, 8, ugwazwe ngomkhonto ekuhlaselweni kwabasekeli beCCC ababebuthene emhlanganweni wokukhankasela ukhetho owawuqoqwe ngumkhokheli wabo uMnu Nelson Chamisa eKwekwe.
Kulabasolwa abahlanu, 5, abamiswe enkantolo kamantshi izolo phezu kokubulawa kwakhe. Amapholisa ayebophe abantu abalitshumi lasithupha, 16, kodwa abanye bakhululwe bengetheswanga cala.
Umsakaso weStudio 7 wehlulekile ukukhuluma lomqondisi wogatsha lwamaCIO uMnu Isaac Moyo.
