amalinks wokungena

Breaking News

Kubotshwe Abangu-16 Phezu Kokufa Komsekeli kaChamisa Ogwazwe Ngomkhonto ‘Yizikliwi zeZanu PF’


A man, suspected of being a ruling ZANU-PF attacker, reacts after being kicked by a supporter of the opposition Citizens Coalition for Change during an electoral rally, Feb. 27, 2022, at Mbizo shopping center in Kwekwe.

WASHINGTON DC - Amapholisa athi asebophe abasolwa abalitshumi lasithupha, 16, phezu kokubulawa komsekeli webandla leCitizens Coalition for Change (CCC) ngabantu abanakanelwa ukuthi yizikliwi zeZanu PF, zona ezimgwaze ngomkhonto izolo.

Isikhulumeli samapholisa uMnu Paul Nyathi ukhuthaze uzulu ukuthi etshiyane lodlakela njalo uthe amapholisa asevule uphenyo phezu kwaloludaba. Uthembise ukuthi bazakwethulela uzulu okunengi maduze.

Udlakela lolu luqhamuke ngesikhathi uChamisa esenkundleni esethula amazwi okukhuthaza inkulungwane lenkulungwane zabantu abaye emhlanganweni wakhe eKwekwe ukuthi bavotele ibandla lakhe.

Lelibandla lithi abasekeli beZanu PF ekade beze emhlanganweni walo begqoke imvunulo yeCCC bezenza abasekeli bakaChamisa bahlasele ngezikhali ezigoqela imikhonto, amatshe lembhembha, balimaza amalunga alo alitshumi lasikhombisa, 17.

Abantu laba bahanjiswe esibhedlela.

Imifanekiso ethulwe nguChamisa lebandla lakhe enkundleni zokuxhumana ezitshiyeneyo iveza abasekeli beCCC abagqoke okulithanga belimele kakubi njalo besopha igazi.

Laba ngabanye babasekeli bebandla likaMnu Nelson Chamisa, eleCitizens Coalition for Change (CCC) abalimeleyo ngemva kokuhlaselwa yizikliwi ezinakanelwa ukuthi ngamalunga eZanu PF emhlanganweni oqhutshelwe eKwekwe nguChamisa ngeSonto. (Pic Credit: CCC/Gift Ostallos Siziba)
Laba ngabanye babasekeli bebandla likaMnu Nelson Chamisa, eleCitizens Coalition for Change (CCC) abalimeleyo ngemva kokuhlaselwa yizikliwi ezinakanelwa ukuthi ngamalunga eZanu PF emhlanganweni oqhutshelwe eKwekwe nguChamisa ngeSonto. (Pic Credit: CCC/Gift Ostallos Siziba)

Loludlakela luza ngemva kokuba umkhokheli kaMongameli Emmerson Mnangagwa, uMnu Constantino Chiwenga, etshele abasekeli beZanu PF ngoMgqibelo ukuthi ibandla likaChamisa bazalichola njengentwala, kubike iphephandaba leThe Standard.

Isikhulumeli sebandla leCCC koBulawayo uMnu Swithern Chirowodza utshele iStudio 7 ukuthi udlakela lolu lukhomba sobala ukuthi akusoze kube lokuthula kukhetho luka2023.

please wait

No media source currently available

0:00 0:03:04 0:00

Ilunga leZanu PF uMnu Believe Gaule uthe lanxa ekusola kakhulu ukubulawa kwelunga leCCC, akumelanga abantu bagijimele ukusola ibandla lakhe ngoba kungela bufakazi.

please wait

No media source currently available

0:00 0:02:06 0:00

Ummeli womanyano wamazwe aseEurope oweEuropean Union (EU) eZimbabwe, uMnu Tim Olkkonnen aye ulusolile loludlakela esithi amapholisa kumele abophe labo abaludalileyo.

Amazwi akhe agcizelelwe yingcwethi kwezombusazwe uMnu Dumisani Nkomo.

please wait

No media source currently available

0:00 0:03:04 0:00

Facebook Forum

XS
SM
MD
LG