amalinks wokungena

Breaking News

EleRussia Lihlasela Ngamandla Kwele Ukraine Okulabantu Abanengi Asebebulewe Ngamabhomba Lokunye


Owesifazana uphakathi kwendlu okufundiselwa abantwana esikolo seStanytsia Luhanska, kwele Ukraine, atshaywe yibhomba ephoswe ngamasotsha akwele Russia.

EleRussia lihlasela ngamandla eleUkraine okulabantu abedlula inkulungwane ezimbili – 2,000 asebefile selokhu kuqhamuke impi le ngeviki ephelileyo. IReuters news agency ibika ukuba eleRussia libhomba indawo ezinengi edolobheni leKarkhiv kanye lesigodlweni salelolizwe eKyiv. EleRussia lithi abantu kumele bebaleke emadolobheni ngoba lizaphosa amabhomba amakhulu azabhidliza inkamba zebutho lezinye.

Kodwa uMongameli Volodymyr Zelenskiy uthi abantu bayazilwela ngakho-ke abayindawo. Ibutho lakwele Russia, elilezimota ezinengi eziphandle kwedolobho leKyiv, lithi zizaqhubekela phambili inkulumo zokuzama ukukhumisana umlotha loba lingasoze lekele ukubhomba emadolobheni. Kulezakhiwo ezihlala uzulu esezibhonjwe emadolobheni amanengi.

Abantu abafika inkulungwane ezintathu lengxenye – 3,500 kubikwa ukuba sebelimele emadolobheni atshiyeneyo. Banengi kakhulu abakubutho lakwele Russia lele Ukraine asefile empini le.

Umthethwandaba weInternational Criminal Court uthi akuvunyelwa okwenziwa ngumkhokheli wakwele Russia, uMnu. Vladmir Putin, okhuthaza ukuba ibutho libhombe santando kwele Ukraine. Umanyano wamazwe omhlaba wonke jikelele oweUnited Nations uthi izizalwane zakwele Ukraine ezifika phose isigidi – 836,000 seziyephephela kwamanye amazwe.

Abadabuka kwamanye amazwe labo sebebalekile elizweni leli bayaphephela kwele Poland, Romania, Hungary lamanye amazwe. Odabuka eZimbabwe ofunda kwele Ukraine, uLaison Moyo, utshele iStudio 7 ukuthi usefikile kwele Hungary labanye bakhe ababaleke eVinniystia National Medical School.

UNkosikazi Monica Mutsvangwa, umphathintambo kahulumene obona ngokwethulwa kwemibiko, utshele iphephandaba leHerald ukuba sebehlenge izizalwane zeZimbabwe ezedlula ikhulu – 118.

Kubikwa ukuba uhulumende uzathengela zonke izifundi ezifisa ukubuyela eZimbabwe amatikiti endizamtshina. Ingcwethi kwezombusazwe, uMnu. Bongani Mkhwananzi, uthi kumele uhulumende azame ngamandla wonke ukususa kwele Ukraine bonke abantu abadabuka eZimbabwe.

Facebook Forum

XS
SM
MD
LG