Ibutho lakwele Russia libhomba ngamandla emadolobheni kwele Ukraine lapho elibhidliza khona izakhiwo ezinjengezikolo, izindlu lezinye indawo okulabantu abacatshe khona. I-Associated Press ibika ukuba isenzo lesi sakwele Russia, esichothozwe ngamanye amazwe akumanyano weUnited Nations, sokudale ukuba abantu abafika isigidi bebaleke kulelolizwe beyaphephela emazweni atshiyeneyo.
EleRussia libika ukuba selilahlekelwe ngamasotsha edlula amakhulu amahlanu – 500 kwathi edlula kancane inkulungwane lengxenye – 1,600 alimala.
EleUkraine lithi kulabantu abedlula inkulungwane ezimbili – 2,000 asebebulewe kulelolizwe njalo selilahlekelwe ngamasotsha labantu abazinikele kubutho befisa ukuvikela ilizwe labo.
Kusenzakala konke lokhu, abadabuka eZimbabwe abafunda kulelolizwe sebephume ngobunengi babo baya kwele Hungary, Poland, Romania lamanye amazwe.
Abanye bebefunda duzane ledolobho leKherson, elihluthunwe libutho lakwele Russia izolo, lasesabelweni seOdesa lapho eleRussia eselisiya hlasela khona ngemibhobho emikhulu enjengaleyo esetshenziswa edolobheni leKyiv lamanye.
Umanyano weUnited Nations uthi kumele eleRussia liphume liphele kulelolizwe. Umanyano lo uvotile izolo wapasisa isinqumo sokusola eleRussia ngokuhlasela eleUkraine.
EleZimbabwe libe ngelinye lamazwe angamatshumi amathathu lanhlanu, 35, akhethe ukungavoti kuloludaba. EleZimbabwe lithi kalihambelani lendaba zokujeziswa kwamazwe kusetshenziswa izijeziso zenotho.
UMnu. Believe Gaule, okubandla leZanu PF, uthi bekuvele kukhangelelwe ukuba eleZimbabwe kalisoze livotele ukuchothoza okwenziwa ngele Russia kwele Unkraine.
UMnu. Rejoice Ngwenya, ingcwethi kwezombusazwe ezimeleyo, uthi eleZimbabwe lingeke laphikisa okwenziwa ngele Russia ngoba amazwe la alobudlelwano obaqala eleZimbabwe liqhuba impi yenkululeko.