amalinks wokungena

Breaking News

IBosso Ithi Sokumele Benze iOperation Boph’ Ijambo Kulandela Ukubhuqwa Ngamanye Amaqembu


Umqeqetshi weBosso, uMandla Mpofu.

Joseph Njanji

Umqeqetshi weqembu le Highlanders uMandla Mpofu uthi bazabopha ijambo ukuze beqale njalo ukunqoba.

UMpofu utshele intathelizindaba ukuba bahlale phansi njengeqembu batshelana iqiniso elisegcekeni elokuthi iqembu kaliqhubi kuhle njalo ngemva kwalokho bavumelane ukuba kumele bakhuphule izinga.

“Ngemva kokudlala leqembu le Bulawayo City ngeSonto edluleyo, lapho esingadlalanga khona kuhle sidlala labomakhelwane, sihlangene ngoLwesibili labafana sahlala phansi sakhulumisana.

Sazibuza imbuzo engapheliyo sathi nansi into yabantu iqedwa yithi, senzeni? Hayi abafana bakhuluma, sazikhulula sonke savumelana ukuthi madoda ijambo kalibotshwe. Ijambo kalibotshwe ngoba ithimu leyi inkulu njalo ilabasekeli abanengi, futhi abasekeli bayo kabathabanga,” kutsho uMpofu.

Iqembu le Highlanders linqotshwe nge 1 ka nya ngele Bulawayo City ngeSonto eyedluleyo.

Ukaputeni njalo engunozinti weqembu le Highlanders uAriel Sibanda yena ulabhele kakhulu ecela ukuba abalandeli beqembu bayale belokhu bexhase iqembu loba lidliwa.

“Sonke siyingxenye yemuli ye Highlanders. Ngicabanga ukuthi siyadingana. Umlandu kawusiwo wethu sodwa njengabadlali kodwa labalandeli beqembu siyabazwela njalo labo kumele basizwele ngoba sisonke njalo siyaludinga usekelo lwabo.

Sisiya eMutare kumele babuye ngobunengi ngoba kumele bebambisane lathi njalo likhumbule eyethu yinhlanganiso enkulu yikho kumele sisekane lapho kukuhle lalapho kukubi,” kutsho uSibanda.

Iqembu le Highlanders ngeSonto lizavakatshela edolobheni lase Mutare ukuyadlala leqembu le Tenax njalo lingena kumdlalo lo lihlezi phezu kwemiklomelo emine ngemva kokudlala imidlalo emihlanu.

Imidlalo yeviki lesithupha yona iyaqala ngoMgqibelo njalo kulomdlalo ogobhozisa amathe edolobheni lako Bulawayo ozakuba senkundleni ye Barbourfields ophakathi kweqembu le Bulawayo Chiefs kanye lele Dynamos.

Umqeqetshi weqembu le Bulawayo Chiefs uNilton Terroso utshele intathelizindaba zemidlalo ukuba ukhangelele umdlalo omkhulu ngeSonto.

“Yebo ngumdlalo omkhulu nxa sikhangela amabizo. Kodwa nxa sikhuluma ngamalungiselelo siqhubekela phambili silungiselela ngendlela efanayo loba nje kukhona okuthile okumele sikulungisise njengoba singatholanga impumela enhle emdlalweni wethu oweviki eledluleyo,” kutsho uTerroso.

Iqembu le Chiefs libe ngutshiki lobhanqa 0 ka 0 lele Tenax ngoMgqibelo odluleyo.

Eminye imidlalo ekhona ngeviki yesithupha eyomncintiswano we Castle Premier Soccer League izadlalwa ngokulandelayo.

NgoMgqibelo iqembu le Herentals lizadibana lele Bulawayo City ngase National Sport Stadium, iqembu le Yadah lizangqikilana lele Manica Diamonds ngase Boabab, kuthi iqembu le FC Platinum lizadlala lele Harare City ngase Mandava.

NgeSonto iqembu le Caps United lizemukela ele Whawha ngase National Sport Stadium, iqembu le Cranborne Bullets lizadibana lele Black Rhinos ngase Baobab, iqembu le Triangle United lizatshayana lele Ngezi Platinum Stars ngase Gibbo kuthi ele Chicken Inn lizemukela ele ZPC Kariba ngase Luveve.

Facebook Forum

XS
SM
MD
LG