amalinks wokungena

Breaking News

Iqala ngoMgqibelo Imidlalo Yalonyaka eyeBasketball Africa League


Iqala ngoLwesihlanu imidlalo yeAfrica Basketball League (Foto: Reuters/Rob Gray-USA TODAY Sports)
Iqala ngoLwesihlanu imidlalo yeAfrica Basketball League (Foto: Reuters/Rob Gray-USA TODAY Sports)

Ihlandla lesibili lemidlalo yeBasketball Africa League (BAL) liqala ngoMgqibelo eDakar kwele Senegal.

Imidlalo le izadlalelwa njalo edolobheni leCairo kwele Egypt leKigali kwele Rwanda.

Amaqembu alitshumi lambili – 12 azangqikilana emidlalweni le. Ngomnyaka ophelileyo eleZamalek yilo elathola isicoco seBAL championship.

Imidlalo yeBAL isekelwa yinhlanganiso yeNBA ebambisana leye International Basketball League.

IBAL yangena kusikhexe esatshiywa yinhlanganiso yeAfrican Basketball League.

IZamalek yathi ithola isicoco seBasketball Africa League nyakenye eKigali Area kwele Rwanda mhlala 29 Nkwenkwezi, lokhu kwakuyikusungula imidlalo ephezulu eye-basketball.

Amaqembu ebasketball kuzwekazi leAfrica aselesikhathi eside asungulwa. EleZamalek lasungulwa ngomnyaka ka1911. Kwaqala ukuba lemidlalo yamaqembu atshiyeneyo kusukela ngama 1970s. Imidlalo le yayiphansi kwenhlanganiso yeAfrican Cup of Champion Clubs.

Lokhu kwenza kwaba labadlali abanengi kusukela ngama 1980s aqala ukudlalela amaqembu akuNBA.

INBA yaqala ukutshengisa uthando lwemidlalo yebasketball kuzwekazi leAfrica kusukela ngomnyaka ka2003. Kwasungulwa imidlalo yokulolonga lokudinga abadlali okwakuthiwa phansi kohlelo lweBasketball Without Borders. Uhlelo lolu lwasungulwa eJohannesburg kwele South Africa.

Uhlelo lolu, olusekelwa yiNBA leFIBA, ngolokudinga abadlali abalethalenta emdlalweni webasketball.

Intathelizindaba uJoad Jose Santarita, osebenza emsakazweni weVOA Portuguese Service, uthi okwamanje banengi abadabuka kuzwekazi leAfrica abadlala kuNBA.

UJoad uthi abadlali laba benza izimanga kuNBA. Bagoqela uJoel Embiid, odlalela iPhiladelphia 76ers. Omunye nguPascal Siakam, odabuka kwele Cameroon, odlalela iqembu leToronto Raptors. Wancedisa iqembu lakhe ukuba lithole isicoco seNBA.

Umqondisi weNBA Africa, uVictor Williams, uthi kunengi abakwenzayo kuzwekazi leAfrica ukwenzela ukuphakamisa umdlalo webasketball.

“INBA itshala imali enengi kakhulu ekuthuthukiseni umdlalo webaskeball kuzwekazi leAfrica. Kuthuthukiswa abaqeqetshi, onompembe labadlali. Sizaqhubekela phambili sisekela umdlalo webasketball.”

Abaqondisi benhlanganiso yeBAL bathi iNBA Africa isekelwa ngabantu abanjengowayengumongameli wakwele Melika, uBarack Obama, loDikembe Mutombo, owadlala kuNBA, odabuka kwele Democratic Republic of Congo.

Emidlalweni yalonyaka njenganyakenye, kulamaqembu alitshumi lambili azadlala eDakar, Cairo leKigali. Umdlalo wakuqala ngoLwesihlanu uphakathi kweqembu leDUC elakwele Senegal lele Seydou Legacy Athletic Club of Guinea. Umdlalo lo uzadlalelwa eDakar.

Amaqembu afakwe ezibayeni ezimbili – iNile Conference leSahara Conference.

XS
SM
MD
LG