Umkhokheli webandla leCitizens Coalition for Change, uMnu. Nelson Chamisa, uthi kuzasetshenziswa idola leMelika uhulumende wakhe enganqoba kukhetho oluzakwenziwa ngomnyaka ozayo.
UChamisa wethule lokhu namuhla emhlanganweni wokukhankasela ukhetho lwama by-elections eGweru eNkabazwe.
“Sifuna kubelenguquko elizweni. Singangena embusweni sizaqala ukusebenzisa idola leMelika. Kuzakuba lenguquko. Okunye njalo sifuna kusetshenziswe kahle konke okwenjiwayo elizweni. Ozatshontsha kumele abotshwe."
UMnu. Ostallos Siziba, umsekeli wesikhulumeli sebandla leCitizens Coalition for Change, uthi kunengi okukhulunywe nguChamisa.
Ibandla leZanu PF lenze umhlangano walo ngoMgqibelo eTsholotsho lapho obekukhangelelwe ukuba kuzakhuluma uMongameli Emmerson Mnangagwa.
Owayengumsekeli kamongameli, uMnu. Kembo Mohadi, nguye ocine esiyakwethula umbiko wokukhankasela ukhetho oluzayo.
Manengi amabandla agcwele izabelo zonke zakwele Zimbabwe lapho akhankasela ukhetho oluzayo oluzakwenziwa mhlaka 26 kunyanga yonale.
Ibandla leMDC-T lele People’s Democratic Party axotshisa amakhansila labamele izigaba ezitshiyeneyo edale lephalamende esithi badlelana loMnu. Nelson Chamisa lebandla ayelikhokhela eleMDC Alliance.