Umanyano weUnited Nations uthi kulabantu abafika phose isigidi lengxenye - 1.3 million asebebalekele impi kwele Ukraine bayaphephela kwamanye amazwe.
I-U.N ithi kukhangelelwe ukuba abantu abedlula izigidi ezinhlanu - 5 million bazabaleka kulelolizwe bayephephela emazweni agoqela elePoland, Romania, Hungary lamanye. Lokhu kwenzakala ngesikhathi eleRussia libhomba abantu makhaza edolobheni elikhulu eleKyiv, Mariupol, Chernihiv, Sumy lamanye.
EleRussia ithi lizakuma kancane ukuhlasela kwamanye amadolobho ukuze abantu babaleke lisale libhekane lebutho lakwele Ukraine. Isicelo lesi senziwe nguMnu. Emmanuel Macron wakwele France. UMongameli Volodymyr Zelenskiyy utshele iAssociated Press ukuba ibutho lakwele Russia libulala abantu mahlayana lisenzela ukuba babaleke kulelolizwe bona bazenzele umathanda kwele Ukraine.
UZelenskiyy ucela amazwe alumanyano weNATO lamalunga eCongress akwele Melika ukuba bemise ukuphapha kwendizamtshina zonke elizweni lakhe ukuze ibutho lakwele Ukraine lilwisane kahle lele Russia.
Kodwa uMnu. Vladimir Putin, uthi kuzavuka impi yomhlaba wonke jikelele iNATO ingangenela kudaba lakwele Ukraine.
EleRussia lithi abantu abafisa ukusuka emadolobheni wonke sebezathwalwa zindizamtshina zibahambise kulelolizwe hatshi amanye amazwe. Kukhanya ibutho lakwele Russia selivale ngci ezinye indawo lapho abantu okumele behambe khona besiya kwamanye amazwe.
UPutin udinga ngamehlo abomvu uZelenskiyy amethesa umlandu wokuzama ukungena kumanyano weNATO. UPutin kadlelani lomanyano lo. Ukuze sihlaziye udaba lolu, sixoxe loMnu. Nhlanhla Moses Ncube, ingcwethi kwezombusazwe ezimeleyo, othi kuyayangisa okwenzakala kwele Ukraine.