amalinks wokungena

Breaking News

Selindize Lahlala Phezu Kwengalane Yemiklomelo Iqembu leChicken Inn


Iqembu lenguqu eleChicken Inn FC

Selihlezi phezu kwengalane yemiklomelo esigabeni saphezulu ese Castle Lager Premier Soccer League iqembu le Chicken Inn, ngemva kwemidlalo yangempelaviki.

Iqembu le Chicken Inn lilemiklomelo elitshumi lanhlanu ngemva kwemidlalo eyisithupha njalo likhokhela iqembu elihlezi endaweni yesibili ele Manica Diamonds ngemiklomelo emibili.

Ekhuluma ngemva komdlalo wangeSonto lapho iqembu lakhe elinqobe khona ele ZPC Kariba nge 2 ka nya, umqeqetshi weqembu le Chicken Inn uJoey Antipas uthe usasemude umango emkhankasweni wokudinga intshantshu zesigaba se Premier Soccer League.

“Konke kuhamba kuhle okwamanje kodwa sisalomsebenzi omkhulu owokuthi konke kuhambe ngendlela ngoba emdlalweni wenguqu kuqakathekile ukuba konke kuhambe ngendlela. Wonke amehlo asekithi khathesi njengeqembu elihlezi phezu kwengalane kodwa kumele siyimele indaba yethu,” kutsho uAntipas.

Iqembu le Triangle lihlezi endaweni yesithathu lilemiklomelo elitshumi lantathu ngemva kokuba linqobe ele Ngezi Platinum Stars nge 1 ka nya.

Endaweni yesine kuleqembu le FC Platinum lona elitshaye ele Harare City nge 1 ka nya kuthi endaweni yesithathu kuleqembu le Herentals lona elibe ngutshiki lobhanqa 1 ka 1 lele Bulawayo City.

Iqembu le Dynamos lisendaweni yesithupha lilemilomelo elitshumi njalo linqobe ele Bulawayo Chiefs nge 2 ka nya kuviki yesithupha eyemidlalo.

Umqeqetshi weqembu le DeMbare uTonderai Ndiraya uthi isifiso sakhe ngesokuba iqembu leli lihle liqhubekele phambili linqoba njengoba linqobe okwakuqala ngoMgqibelo.

“Ngilethemba elokuba lokhu yisibonelo salokho okuhle osekuzahlala kusenzakala. Ngithemba njalo ukuthi sizasebenza gadalala ukuzilolonga ukuze sidlale ngcono, ikakhulu ukuba sihlohle kanengi,” kutsho uNdiraya.

Bekungokwesibili ukuba iqembu le Bulawayo Chiefs linqotshwe kumidlalo yeligi njalo umqeqetshi walo uNilton Terroso uthi lesisimo kasibathokozisi.

“Akula muntu othakazelela impumela esesithe sayithola, kubaqeqetshi kanye labo bonke abayingxenye yeqembu.

Siyakwazi ukuthi kumele sikhweze amasokisi njalo akumelanga ukuba sihlale sikhuluma ngakho kodwa kumele njengeqembu sizame ubugcono bethu,” kutsho uTerroso.

Iqembu le Bulawayo Chiefs lihlezi endaweni yethoba munwe munye engalaneni yemiklomelo ngemva kokuba linqobe kabili, laba ngutshiki lobhanqa kabili, laphinda lanqotshwa kabili.

Emsileni wengalane kuhlezi iqembu le Whawha lona elithatshuzwe nge 6 ka nya liqembu le Caps United njalo elilemiklomelo emibili.

Endaweni yesibili nxa usuka emsileni kuleqembu le Cranborne Bullets lalo elilemiklomelo emibili njalo elinqotshwe ngele Black Rhions nge 3 ka 1.

Iqembu le Yadah lisendaweni yesithathu nxa usuka emsileni lilemiklomelo emine njalo libe ngutshiki lobhanqa 1 ka 1 lele Manica Diamonds.

Endaweni yesine usuka emsileni kuleqembu le Bulawayo City elilemilomelo emihlanu njalo elibe ngutshiki lobhanqa 1 ka 1 lele Herentals.

Iqembu le Highlanders lisendaweni yetshumi lanye njalo lilemiklomelo emihlanu ngemva kokuba ngutshiki lobhanqa 0 ka 0 lele Tenax ikanti lona ele Tenax lihlezi endaweni yetshumi lantathu lilemiklomelo eyisithupha.

Facebook Forum

XS
SM
MD
LG