amalinks wokungena

Breaking News

Abadabuka eZimbabwe Ababaleke Kwele Ukraine Bathi Sebezama Ukubuyela Ekhaya


Abadabuka eZimbabwe ababaleka kwele Ukraine basemngceleni wakwele Poland.

Abadabuka eZimbabwe abafunda kwele Ukraine, bathi baphume nzima kulelolizwe ngoba beselibhomba ngamandla eleRussia. Abanye babo babaleke bayaphephela kwele Poland abanye baya kwele Romania lamanye amazwe angomakhelwane.

Uhulumende weZimbabwe uthi usencede abedlula – 118 abadabuka eZimbabwe abafunda kwele Ukraine asebebaleke baya kwamanye amazwe njalo wathengela abanye babo amatikiti endizamtshina ukuze babuyele ekhaya.

UNkosazana Nonhlanhla Moyo, obefunda eNational University of Trade and Commerce edolobheni leKyiv, wabaleka kulelolizwe wayaphephela kwele Romania.

"Five days and five nights besalisa ukugada from Kyiv. Sadlula eOdessa sisiya kwele Romania. Eborder basamukela kuhle sangena sibili. Okwamanje sengise Bucharest kodwa asikahlangani leracism. Ngimelele umalume ukuthi angithumele I-flight ticket ukuze ngikwanise ukubuyela ekhaya. And I don't know what will happen to my education."

UJohn Masamba laye obaleke kwele Ukraine uthi uhambe nzima ukuze afike kwele Germany. Ufisa ukubuyele ekhaya.

"I'm on a scholarship studying medicine but l can't tell you who sponsored me. Ngabaleka last Monday ngisuka eKyiv ngetrain khona manje ngise Germany eFrankfurt to fix my travel documents. Ingalunga ngiyabuyela ekhaya. Though kwakule too much racism bezama ukusivimba but luckily ngangena ngenkani esitimeleni."

UNkosazana Sihle Ndlovu, owenelisa ukufinyelela ukufika kwele Poland, uthi umumo ubumubi lapho abaleke khona.

"Ngitshaya luvalo angisazi ngiyesaba bengicabanga ukuthi ngizakufa. Ngiyafunda lami ngiyenza my last year eBogomolets lapho engenza iBio Chemistry. Ngise Poland okwamanje endaweni okuthiwa yi-Lublin. Khathesi sikushelter lapho abasiprovide khona ngeshelter bathi bazasisa ePrezemysi yikho esizathola indlela zokuthi sibuyele back ekhaya. Ikusasa yami angisakwazi sengiphelelwe."

Omunye osePoland nguMnu Roland Nleya, obefundela iEngineering eTaras Shevchenko University of Kyiv, uthi ikusasa yakhe isimnyama.

“Angazi ngizakwenjani lokuthi what's next. I have to go back home ngoba lapha ePoland akuhlaleki. Angisela cent njalo ukuhlala njenge refugee kunzima kimi. Abantu balapha bayasizonda abantu abamnyama and Its sad.”

Uhulumende weZimbabwe uthi lokhu eqhubeka ngohlelo lokuphathisa izifundi zeZimbabwe ebeziseUkraine.

Lokhu kubikwe nguphathintambo obona ngezokwethula kwemibiko, uNkozikazi Monica Mutsvanga, ekhuluma leStudio 7.

"Uhulumende usebenza gadalala esebenzisa izigodlo zabameli beZimbabwe eGermany lase Russia ukuthi sincedise izizalwane zeZimbabwe. Ngikhuluma nje baphakathi kokusebenza banikiwe konke okokuthi bancede izizalwene lezi. Kumele babone ukuthi bayanceda bonke abantwana abangu 118 njalo bayathenga lamatiki endiza ukuthi babuye ekhaya."

Impi le ikhanya iyaphambili eUkraine, iRussia ijikela amabhomba mahlayana, akwaziwa ngaphandle kwezifundi lezi ukuthi zingaki izizalwane zeZimbabwe ebezihlala kwele Ukraine.

Abafundi labo akwaziwa ukuthi basazokwenzani bengabuyela ekhaya njalo labo ababebhadalelwa yizihlobo ukuthi bafunde eUkraine ikusasa yabo layo isemnyameni.

Facebook Forum

XS
SM
MD
LG