WASHINGTON DC – Umgcinisihlalo weZanu PF uNkosikazi Oppah Muchinguri-Kashiri uxwayise abasekeli bebandla lakhe ngoMgqibelo ukuthi bengalingeki bavotele iCitizens Coalition for Change (CCC) ngoba ilibandla labathengisi.
Ekhuluma emhlanganweni wokukhankasela ukhetho awenzele eKaroi, uMuchinguri uthe njalo ufuna ukuhlatshwa ijekiseni yeCovid-19 yesine ukuze engabulawa yilumkhuhlane ngoba efuna ukuphila ngokunaphakade ukwenzela ukuthi enqabele iCCC ukungena embusweni.
Uthembise abalandeli beZanu PF inhlelo zamanzi ahlanzekileyo lokuthi uhulumende uzabakhela izindlu emadolobheni abuye abaphe amaphepha azo afaneleyo.
Ngesikhathi uMuchinguri esenza umhlangano wakhe eKaroi ekhululekile, umkhokheli weCCC uMnu Nelson Chamisa ubethwaliswe nzima ngamapholisa ohlangothi lwe-riot eMarondera emalisa ukwenza owakhe umhlangano wokukhankasela ukhetho.
Inkulungwane zabasekeli balelibandla ebezibuthene enkundleni yeRudhaka zichithekile zabuyela emakhaya ngemva kokuba amapholisa ethe ubungekho emthethweni lumhlangano.
Ilunga leZanu PF uMnu Joseph Tshuma utshele iStudio 7 ukuthi uyakusola kakhulu ukwaliswa kukaChamisa ukwenza umhlangano, esithi amapholisa kumele ekele abezombusazwe bekhankase bekhululekile njengokutsho kukaMongameli Emmerson Mnangagwa.
