WASHINGTON DC – Abanye abasekeli beCitizens Coalition for Change (CCC) sebexwayise umkhokheli wabo uMnu Nelson Chamisa ukuthi engalokothi afake uNkosikazi Thokozani Khupe esikhundleni ngemva kokuveza kwakhe ukuthi yena labalandeli bakhe bazavotela iCCC kumaby-elections ngoMgqibelo kanye lakukhetho luka2023.
UMaKhupe wazise izolo ukuthi ukhethe ukuxhasa uChamisa ngoba kulesidingo sokuthi amabandla aphikisayo amanyane akhiphe iZanu PF embusweni.
Kodwa abanye abasekeli beCCC bathi abakwazi ukumxolela uMaKhupe kanti njalo abamethembi ngob wadiliza ibandla labo ngokuxotshisa amalunga ephalamende lamakhansila, yikho nje kuyiwa kumaby-elections.
Kodwa abanye bathi uMaKhupe wenze kuhle nanku laye uMnu Chamisa wazikhulumela ukuthi umuntu wonke wamukelekile kubandla lakhe.
Ukwehlukana kwemibono lokhu phakathi kwabasekeli beCCC kuvele enkundleni zokuxhumana ezifana leTwitter leFacebook ngemva kombiko kaMaKhupe awethulele intathelizindaba izolo egqoke isikipa esilithanga esilomfanekiso kaChamisa.
Isikhulumeli seCCC uNkosazana Fadzayi Mahere utshele iStudio 7 ukuthi abasekeli abanqineke ngodaba lukaMaKhupe akumelanga bazihluphe kakhulu ngoba ibandla lizahlonipha izifiso zabo.
Ingcwethi kwezombusazwe uMnu Dumisani Nkomo utshele lumsako ukuthi kubalulekile ukuba amabandla aphikisayo abambane kuyiwa kukhetho luka2023 ukuze enyuse amathuba awo okunqoba iZanu PF.
