Kulabanye abazali abathi bakhathazekile ngodaba lokusilela kolwazi lemfundiso eyanelayo phezu kohlelo lokuhlatshwa kwabantu ijekiseni lokuzivikela kuCOVID-19, besesabela abantwababo ukuba bangaphazamiseka impilakahle yabo ikakhulu abaphila leminye imikhuhlane efana lowe asthma.
Lokhu kuza ngesikhathi uhulumende eyazise ngokusungula uhlelo lokuhlaba abantu ijekiseni lokuzivikela kuCOVID-19, olugoqela abaleminyaka elitshumi lambili kusiya phezulu inengi kungabantwana besikolo, lona olusungulwe izolo mhla ka 21 Mbimbitho.
Omunye walaba bazali kunguNkosikazi Bahle Nyathi wasemzini weBluffhill eHarare, othi lokhe engakuzwisisi ukuthi kungani kumele abantu bahlatshwe lelojekiseni, lanxa walihlatshwa yena.
“ Ayi, mina kodwa angiku-understand lokho okokuthi abantwana behlatshwe i-vaccine ngoba even lathi ebadaleni vele angizange ke ngikuzwisise. Lanxa sahlatshwa kodwa, vele asikuzwisisi okuyinto kwakhona, siyabe simphonkwenza nje ukuthi njengokuba kungumthetho we-government kodwa akuzwisiseki lokho ukuthi sivume ukuthi abantwana behlatshwe ijekiseni. ”
Uthi akavumelani lodaba lokuthi abantwana balihlatshwe lelo jekiseni uNkosikazi Nyati esithi ngoba kulokhe kungakabi lolwazi olwanelayo ngalo, abanjengaye besemnyameni ngokusebenza kwalo.
“ Ngoba ma kuhlatshwa abantwana khonaphana, umntwana uyangenwa ngumkhuhlane futhi beseqalisa ukuhlupha esegula, esesenzani ngoba even khathesi abadala labo, abahlabayo, wayeziphilele kodwa khathesi usehlala egula. So, mina angikuzwisisi lokho ukuthi umntwana ehlatshwe i-vaccine, vele angikuzwisis lokho, ukuthi ngathi abantwana behlatshwe, hayi, akuzwisiseki lokho. ”
Umnumzana Raphael Phiri waseHarare uthi ufisa ngaye uhulumende uyacaca kulokho okungenziwa ebantwaneni abavele bephila leminye imikhuhlane engathelelanwayo njalo ingelapheki.
“ For example, kule Asthma, kuyini okungenzakala, sibe kwazi kulokuthi abantwana baphonguhlatshwa nje. Plus abantwana, abasoze bakwanise ukuthi bakhulume abanye bakhona ukuthi bayisima kanjani. Ukuhlatshwa, yes, sivikela i-COVID but lakho siyafisa ukuthi ngani siyakwazi ukuthi, i-effect yakhona yaleli jekiseni abayihlatshwayo, yini, emuntwini ovele ezigulela, eleminye imikhuhlane.? ”
Kodwa uhulumende uthi abazali kabangesabi bavumele abantwababo balithole lelojekiseni lokuzivikela ngoba lingela ngozi.
Umnumzana Taungana Ndoro, isikhulumeli sogatsha lwezemfundo Primary le Secondary ulandisa kabanzi ngalokho.
“ Ngoba lamajekiseni ahlolwa atholakala ukuba alungile njalo ezosiza ukulondoloza ukusabalala lokulondolozwa kwaleligciwane ezikolweni zethu kanye lasemphakathini. Sifuna lube seluphelile du lolubhubhane lweCOVID-19 ezikolweni zethu nxa sezivulwa ku-term ezayo. Luhle kakhulu loluqhutshwa nguhulumende ngakho umuntu wonke uyakhuthazwa ukuthi alisebenzise lelithuba.”
Loluhlelo olusungulwe nguhulumende, lokuhlaba ijekiseni lokuzivikela kuCOVID-19 kulabo abekade bengakahlatshwa, lwehlukaniswe ukuba lwenziwe ngezigaba ezimbili. Esakuqala kungesisungulwe mhla ka 21 Mbimbitho sizophela mhla ka 3 kunyanga kaMabasa ( 21 March to 4 April 2022 ), esesibili sona sikhangelelwe ukuqala mhla ka 2 ngoNkwenkwezi kusiyafika kumhla ka 15 wenyanga inye ( 2 to 15 May ).
Uhulumende uthi uqhuba lezinhlelo ngenjongo yokufuna ukukhuphula inani labavikelekileyo ngokwaneleyo elizweni ukuze anelise laye ukufinyelela kusilinganiso esikhangelelweyo umhlaba wonke jikelele, sokungamatshumi ayisikhombisa ekhulwini - 70% sabasebevikelekile ngokugcweleyo, i-global herd immunity, kusiyafika inyanga kaNhlangula kuwonalo umnyaka ka 2022.
