amalinks wokungena

Breaking News

UJoel Luphahla Uthi Uzazama Uzazama Ukuvuselela Iqembu leHighlanders Elidonsa 'Ngefalasi'


Umsekeli womqeqetshi weqembu leHighlanders FC, uJoel Luphahla.

Osanda kuqhatshwa ukuba ngumsekeli kamqeqetshi weqembu leHighlanders uJoel Luphahla uthi bekuvele kuliphupho lakhe ukuqeqetsha iqembu leBosso.

ULuphahla uthi kuyamjabulisa ukuba ngemva kweminyaka emihlanu eqale umsebenzi wokuqeqetsha imisebenzi yakhe isidale ukuba aqhatshwe kuqembu leHighlanders njalo isifiso sakhe yikuba iqembu liphumelele ekudlaleni kwalo.

“Ngilesifiso nje ukuthi ekuhambisaneni kwethu lapha iqembu lithole impumela enhle ukwenzela lakusasa ngoba umuntu ocine ukusijabulisa nguMethembe ngo 2006 njalo lanamhlanje silokhu sikhuluma ngakho.

“Ukuqeqetsha kimi yikutshiya imbali yikho lami ngifuna elami igama lalo likhulunywe kuthiwa ngadlala sathola izicoco ngaphinda ngaqeqetsha iqembu lathola izicoco.”

ULuphahla uza kuqembu leHighlanders ngemva kokutshiya kuqembu akade elisebenzela eleGolden Eagles lona elidlala kusigaba seNorthern Region Division One Soccer League.

Phambilini kokuqhatshwa liqembu leGolden Eagles ukewasebenzela iqembu leTelOne lona alingenise kusigaba seCastle Lager Premier Soccer League ngomnyaka ka2018.

Umqeqetshi weqembu leHighlanders uMandla Mpofu wamukele ukuqhatshwa kuka Luphahla kuqembu le Bosso.

“Siyakwazi ukuthi umdlali lo wayedlala phambili esadlala yikho ke ngumdlali engikhangelele ukuba uzangilolela abafana phambili ngoba thina siyenelisa ukuthola amathuba amanengi kabi kodwa sehluleke ukuthi siwahlohle.

Ngokubuya kuka Luphahla ngibona angani sekuzakuba lula.”

Iqembu le Highlanders ngeSonto lizayemukela eleYadah enkundleni yeBarbourfields njalo lingena kulumdlalo lihlezi endaweni yetshumi lane engalaneni yemiklomelo ngemva kwemidlalo eyithoba minwe mbili.

Umdlali wenkabeni yenkundla uAdrian Silla uthi sebekhuthazane njengabadlali ukuba abazame ukubungcono babo ukuze iqembu liphakame.

“Njengabadlali satshelana ukuba kumele sikhweze amasokisi sidonse kanye kanye njengeqembu. Labokaputeni beqembu labo bayasikhuthaza ukuba konke kuzalunga.”

Eminye imidlalo yesigaba seCastle Lager Premier Soccer League eyeviki lathoba munwe munye izadlalwa ngokulandelayo.

NgoMgqibelo iqembu leBulawayo City lizadlala le Triangle ngase Barbourfields, iqembu leZPC Kariba lizemukela ele Tenax ngase Nyamhunga, iqembu leHerentals College lizadibana leleCaps United ngase National Sports Stadium, iqembu leBlack Rhinos lizadibana lele Bulawayo Chiefs ngase Sakubva kuthi iqembu le Ngezi Platinum Stars lizadlala lele Chicken Inn ngase Baobab.

NgeSonto iqembu le Whawha lizadlala lele Cranborne Bullets ngase Ascot, iqembu le Manica Diamonds lizemukela ele FC Platinum ngase Sakubva kuthi ele Harare City lizangqikilana lele Dynamos.

Facebook Forum

XS
SM
MD
LG