Intengo yempahla lokudla ezitolo iqhubeka iqansa ngesikhathi ugatsha lwezamanani, olwe Zimstat lusithi umuntu munye usedinga imali efika phose amadola eZimbabwe azinkulungwane ezilitshumi, Z$9 144 kumbe US$38 ukuthi athole okumqoka okungamphilisa ngenyanga inye.
Ingcwethi kwezombusazwe, uMnu. Methuseli Moyo uthi abantu bakhanya sebejwayele ukukhwela kwentengo lokhu.
Umkhokheli wenhlanganiso yabaphila ngokuthenga bethengisa emgwaqweni, eye Bulawayo Taders’ Associaiton, uNkosazana Debra Mukasa uthi impilo insizima kakhulu okokuthi abantu sebezama amacebo atshiyeneyo ukuze bangalambi.
Ingcwethi kwezenotho, uMnu. Lenox Mhlanga uthi intengo yokudla iyakhwela lanxa abantu bengatshengiseli ubuhlungu bayakhala abantu abanengi ngoba besazi ukuthi akula lapho abangathola khona isisambululo.
Umhlanga uqhubeke esithi abahuquluzi benotho, obambazonke kumbe ama cartel yibo abenza ingengo iqhubeke iqansa.
Intengo yamafutha ezimota okuthiwa yiyo ebangele ukukhwela kwenye impahla lokudla ibikwa yehlile emkambo womhlaba jikelele kodwa eZimbabwe intengo yokudla lokhu ingehlanga.
