amalinks wokungena

Breaking News

UNqobizitha Masuku Uthi Khona Kusazoba Mnandi kuBosso


Nqobizitha Masuku

Uthi khona kusazoba mnandi umdlali weqembu leHighlanders ohlohla sakudlala kulezinsuku uNqobizitha Masuku.

UMasuku, ongumsekeli ka-kaputeni weqembu leHighlanders, uselitshayele emambuleni kahlanu kumidlalo eyithoba munwe munye eye-ligi.

Uthi ukusebenza kanzima kanye lokuzimisela yikho okumenza ahlohle kangaka lonyaka.

“Ukuzilolonga kuhle kanye lokufika endaweni eziseduze lesango yikho okwenza loba yiliphi ithuba engilitholayo ngenelise ukuthi ngilitshaye liyephakathi.

Isifiso sami yikuthi ngibe ngilokhu ngiwatshaya ngisiyaphambili, sizabona ke ukuthi umnyaka usiyaphela ngiyabe sengingaphi,” kutsho uMasuku.

Iqembu leHighlanders lizavakatshela eleTriangle ngeSonto emdlalweni weviki yetshumi kusigaba se Castle Lager Premier Soccer League njalo umqeqetshi walo uMandla Mpofu uthi sebehlome baphelela njalo sebelinde ukuyahlasela kuphela.

“Amalungiselelo ahamba kuhle. Ihlomile iya khonale eTriangle. Sifuna ukuyathatha imiklomelo emithathu,” kutsho uMpofu.

UMasuku laye uthembise abalandeli be-Bosso ukuba labo njengabadlali bazabopha ziqine ukuze bephumelele.

“Akukalungi ngendlela esifuna ngayo kodwa siyathembisa ukuthi njengamadoda sizasebenza ngamadlabuzane langamandla ethu wonke. Siqinise lomdlambula sibili ngoba leli liqembu elikhulu kakhulu lathi esilisekelayo.

Noma yiphi indoda loba ijaha elingabe likhethiwe ukuthi limele iqembu le Highlanders kumele lisebenze ngokuzikhandla, lokukhalipha, langesibindi ukuze iqembu leli liyephambili,” kutsho uMasuku.

Imidlalo yeviki yetshumi kusigaba se-Castle Lager Premier Soccer League iqala ngoMgqibelo lapho amaqembu azadlala ngokulandelayo.

Iqembu elihlezi phezu kwengalane eleChicken Inn lizadibana lele Manica Diamonds ngase Luveve, iqembu leYadah lizangqikilana lele Herentals ngase Baobab, iqembu leFC Platinum lizatshayana lele Whawha ngase Mandava, iqembu leCraneborne Bullets lizemukela ele Bulawayo City ngase Sakubva kuthi iqembu leZPC Kariba lizadlala lele Harare City ngase Nyamhunga.

Kweminye imidlalo yangeSonto iqembu leTenax lizemukela eleCaps United ngase Sakubva, iqembu leBulawayo Chiefs lizangqikilana lele Ngezi Platinum Stars ngase Luveve kuthi iqembu leDynamos lizadlala lele Black Rhinos ngase National Sports Stadium.

Facebook Forum

XS
SM
MD
LG