amalinks wokungena

Breaking News

EleUkraine Lithi Ibutho leRussia Libulele Abantu Abanengi Lalahlela Izidumbu Emagodini Agejwe Ngesiphangiphangi


Izidumbu zabantu ababulewe libutho lakwele Russia zigcwele emigwaqweni edlobheni leBucha lele Irpin duzane leKyiv..

EleUkraine lithi kumele uMnu. Vladmir Putin, okhokhela ilizwe leRussia, ajeziswe ngamazwe wonke womhlaba ngoba ibutho lakhe libulele abantu abanengi labaphosela emagodini aphandwe ngesiphangiphangi – ama mass graves - emadolobheni agoqela iBucha, Irpin lamanye.

IReuters ibika ukuba kulabantu abanengi okumangalisayo abancwatshwe ndawonye emagodini agejwe libutho lakwele Russia elibabulele emadolobheni la ngesikhathi lihlasela kwele Ukraine.

Elinye lamagodi la kucatshangelwa ukuba lilabantu abedlula ikhulu lamatshumi amahlanu – 150 okuthiwa babezihlalele ezindlini zabo kumbe bezihambela bagolwa njengentethe, batshaywa baphoselwa endaweni le.

Kugcwele izidumbu emigwaqweni emadolobheni la. UMongameli Volodmyir Zelenskyy uthi kumele uPutin ajeziswe ngesenzo lesi.

UZelensky, owethulele umbuthano weGrammy Awards isicelo sokuncediswa kudaba lokuhlaselwa ngele Russia, uthi eleRussia lihlasela ngamandla kwezinye indawo ezigoqela esabelweni se-Odesa.

UPutin uyakuphika lokhu esithi ngamanga aluhlaza tshoko ukuba ibutho lakhe libulala abantu mahlayana kwele Ukraine.

UMnu. Rejoice Ngwenya, ingcwethi ezimeleyo, uthi uPutin kumele ajeziswe.

Kodwa uMnu. Ngqabutho Mabhena, unobhala jikelele webandla leZimbabwe Communist Party, uthi kukhanya engani kungamanga okunye okwethulwa nguhulumende kaZelenskyy.

Kubikwa ukuba kulabaphathi bamadolobho abalitshumi lanye – 11 abasezandleni zebutho lwakwele Russia eselibulele omunye wabo. EleRussia selisuse ibutho duzane ledolobho elikhulu lakwele Ukraine, iKyiv. Kubikwa ukuba lifuna ukuhluthuna indawo enkulu kusiyafika uNkwenkwezi.

Facebook Forum

XS
SM
MD
LG