amalinks wokungena

Breaking News

Lidonsa Nzima Iqembu leBulawayo City


Umqeqetshi weqembu lenguqu ele Bulawayo City, uPhilani Ncube

Iqembu leBulawayo City yilo elijeke amanye wonke engalaneni yemiklomelo lilemiklomelo eyisithupha ngemva kokudlala imidlalo elitshumi lanye kodwa uNcube uthi lesisimo silakho ukuguquka ngokuhamba kwesikhathi.

Umqeqetshi weqembu lomdlalo wenguqu ele Bulawayo City uPhilani Ncube uthi kusasemasinyane ukuthi kuthiwe bangelinye lamaqembu azagunyulwa kusigaba se Premier Soccer League loba nje sekuyibo abasemsileni wengalane yemiklomelo.

Iqembu le Bulawayo City yilo elijeke amanye wonke engalaneni yemiklomelo lilemiklomelo eyisithupha ngemva kokudlala imidlalo elitshumi lanye kodwa uNcube uthi lesisimo silakho ukuguquka ngokuhamba kwesikhathi.

“Singanqoba imidlalo emibili ilandelana siyaqansa sisuke emsileni. Iqembu le Whawha belisemsileni okwenyanga ezimbalwa ezedluleyo kodwa namhla selikhuphuke laya endaweni yesibili nxa usuka phansi. Silakho ukusinda ekugunyulweni,” kutsho uNcube.

NgoMgqibelo iqembu le Bulawayo City linqotshwe nge 2 ka nya ngele FC Platinum njalo limpumela itsho ukuba selinqotshwe kumidlalo eyisikhombisa, lanqoba kanye, laba ngutshiki lobhanqa kathathu.

Umqeqetshi weqembu le FC Platinum uNorman Mapeza yena utshele intathelizindaba zemidlalo ukuba yena lonyaka uqakathekisa ukufundisa abadlali bakhe ukudlala ibhola elibukekayo.

“Mina angesabi ukudliwa ngilahlekelwe ngumsebenzi. Engikufunayo yikuthi amajaha lawa abekwazi ukuthi ibhola lidlalwa njani. Kungancono nginqotshwe ngisuke ngizihambele ekhaya, kodwa okusalayo amajaha lawa ngizabe ngiwafundisile ukuba ibhola kumele lidlalwe njani,” kutsho uMapeza.

Kweminye imidlalo edlalwe ngoMgqibelo iqembu le Dynamos likhuphuke layahlala phezu kwengalane yemiklomelo ngemva kokuba ngutshiki lobhanqa 0 ka 0 lele Ngezi Platinum Stars kwathi lelo ebelihlezi phezulu phambilini ele Chicken Inn lehle laya endaweni yesibili ngemva kokubhaxabulwa nge 3 ka nya ngele Whawha.

Womabili lawa maqembu alemiklomelo engamatshumi amabili lantathu kodwa ayehlukaniswa linani lamagoli ahlohliweyo.

Kweminye imidlalo yangoMgqibelo iqembu le Harare City libe ngutshiki lobhanqa 1 ka 1 lele Tenax, iqembu le Herentals linqobe ele Triangle nge 1 ka nya, kuthi iqembu le Black Rhinos litshaye ele ZPC Kariba nge 2 ka 1.

NgeSonto umqeqetshi weqembu le Highlanders uMandla Mpofu usele edanile ngemva kokuba liphose latshiselwa ekhaya ngele Cranborne Bullets.

“Engingakutsho yikuthi ngidanile ngendlela esidlale ngayo ikakhulu ngehlandla lakuqala elomdlalo. Kodwa ngehlandla lesibili sidlale ngcono njalo ngitshayela ihlombe abafana ngokulwisa abakwenze ukuthi sicine sithole umklomelo owodwa. Bengifuna imiklomelo emithathu kodwa sicine sithola owodwa njalo ngiyababonga abafana ngoba bekuzayangisa ngabe sinqotshwe sidlala singekhaya,” kutsho uMpofu.

Iqembu le Bosso lihlezi endaweni yetshumi ngemva kwemidlalo yangempelaviki eyedluleyo njalo litshiywa ngemiklomelo eyithoba munwe munye ngele Dynamos, okuyilo elihlezi phezu kwengalane.

Kweminye imidlalo edlalwe ngeSonto iqembu le Manica Diamonds libe ngutshiki lobhanqa 0 ka 0 lele Bulawayo Chiefs kuthi ele Caps United linqobe ele Yadah nge 1 ka nya.

Endaweni yesibili nxa usuka emsileni kuleqembu le Whawha lona elilemiklomelo eyithoba minwe mbili. Iqembu le Yadah lalo lilemiklomelo eyithoba minwe mbili njalo lisendaweni yesithathu nxa usuka phansi kuthi endaweni yesine usuka emsileni kuleqembu le Cranborne Bullets lona elilemiklomelo elitshumi.

Ezemidlalo siloJoseph Njanji weStudio 7
please wait

No media source currently available

0:00 0:02:45 0:00

Facebook Forum

XS
SM
MD
LG