amalinks wokungena

Breaking News

Umqeqetshi weBosso Uthi Baqine Saka Kulandela Ukunqoba iDembare


UMandla Mpofu umqeqetshi weqembu leHighlanders F.C.

“Ngikhuthaza abadlali bami ukuthi ngifuna idlabuzane ebesilalo emdlalweni wethu le Dynamos silifake kuyo yonke imidlalo ebuyayo. Angiboni ukuthi likhona iqembu elingenelisa ukusinqoba," kutsho uMpofu.

Umqeqetshi weqembu lomdlalo wenguqu eleHighlanders, uMandla Mpofu, uthi iqembu lakhe alingeke linqotshwe ngamanye nxa lingadlala ngendlela elidlale ngayo ngosuku lokuthakazelela uzibuse lapho elinqobe khona eleDynamos laphakamisa inkezo yeIndependence.

U-Mandla Mpofu umqeqetshi weqembu lenguqu eleHighlanders FC
U-Mandla Mpofu umqeqetshi weqembu lenguqu eleHighlanders FC

Iqembu leHighlanders lizavakatshela iqembu eliphethe isicoco seligi eleFC Platinum ngoMgqibelo enkundleni yeMandava njalo uMpofu uthi abafana bakhe bengayithatha yonke imiklomelo emithathu nxa bengadlala ngendlela abadlale ngayo ngoMvulo.

“Ngikhuthaza abadlali bami ukuthi ngifuna idlabuzane ebesilalo emdlalweni wethu le Dynamos silifake kuyo yonke imidlalo ebuyayo. Angiboni ukuthi likhona iqembu elingenelisa ukusinqoba. Ngifuna beqhubeke ngedlabuzane abakade belalo kumdlalo weDynamos sisiya phambili. Njengoba leyi iviki ngoMgqibelo sisiya kuqembu leFC Platinum, ngifuna behambe beledlabuzane abakade belalo sidlala leqembu leDynamos.”

Umdlali weqembu leHighlanders uRahman Kutsanzira laye uthi indlela abadlale ngayo bedlala leqembu leDynamos ibatshiye sebelokuzithemba.

Rahman Kutsanzira
Rahman Kutsanzira

“Ukunqoba iqembu leDynamos uyazi lawe ukuthi yinto enkulu kakhulu njalo kuyasinikeza amandla. Yonke ithimu ebuyayo khathesi sibili ngilethemba ukuba sizathatha umdlalo ngamunye ngamunye sibe lokhu sinqoba. Khona kuyathembisa sibili.”

Iqembu leHighlanders lilabadlali abambalwa abake badlalela iqembu leFC Platinum ababalisa yena uKutsanzira, uNqobizitha Masuku, uJoel Ngodzo kanye lomgadli ohlohle igoli elidale umehluko kumdlalo wenkezo ye Independence uStanley Ngala.

Stanley Ngala
Stanley Ngala

“Lumdlalo oweFC Platinum ulakho ukungenza ngizizwe ngilomhedehede njengomuntu owake walidlalela leloqembu kodwa engingakutsho yikuba ibhola liyafana. Siliqembu silakho ukuba sibelawo kumbe singabi lawo umhedehede kodwa okukhona yikuba sizawuthatha njengomunye nje wemidlalo esiyidlala lamanye amaqembu.”

Kweminye imidlalo yangoMgqibelo iqembu leChicken Inn lizadlala lele Bulawayo City ngase Luveve, iqembu leTenax lizemukela eleYadah ngase Sakubva, iqembu leHarare City lizangqikilana lele Black Rhinos ngase National Sports Stadium kuthi eleZPC Kariba lizadlala lele Ngezi Platinum Stars ngase Nyamhunga.

NgeSonto iqembu leCranborne Bullets lizadlala lele Herentals College ngase Sakubva, iqembu leDynamos lizemukela ele Manica Diamonds ngase National Sports Stadium, iqembu leBulawayo Chiefs lizadlala lele Whawha ngase Luveve kuthi eleTriangle lizadibana lele Caps United ngase Gibbo.

Facebook Forum

XS
SM
MD
LG