amalinks wokungena

Breaking News

Bakhala Ngokuhlukunyezwa Ngamapholisa Abalandeli beBosso


Bajamelene lamapholisa abalandeli beqembu le Highlanders

Umdlalo wenguqu lo awusafikanga emaphethelweni ngemva kokuba kube lobudlwangudlwangu kodwa inengi labasekeli beqembu le Highlanders bathi leso simo besingavikeleka.

Abalandeli beqembu lenguqu ele Highlanders bakhala ngokuthi bahlukunyeziwe ngamapholisa, ngoMgqibelo eZvishavane, lapho leloqembu ebeliyedlala leleFC Platinum emdlalweni owe Castle Lager Premier Soccer League.

Umdlalo wenguqu lo awusafikanga emaphethelweni ngemva kokuba kube lobudlwangudlwangu kodwa umsekeli weqembu le Highlanders uNkosilathi Phiri uthi leso simo besingavikeleka.

“Okwenzakale eMandava kubuhlungu. Okwakuqala abasekeli beqembu le Highlanders bekungamelanga bangene enkundleni kodwa indlela amapholisa abhekane ngayo lesosimo akusiyo elungileyo.

Bekungela ndingeko eyokuphosela intuthu ehitshayo ngoba besekusiba lobubelo enkundleni. Phezu kokujikela intuthu ehitshayo baphinde batshaya abantu abavunule impahla ezilombala omhlophe lomnyama phandle kwenkundla kulokuba ngabe bona babamba bavalela labo ababengene enkundleni.

Bekungela ndingeko yalokho,” kutsho uPhiri.

Umdlalo umiswe ngemva kokuba iqembu le FC Platinum seliphiwe umbekwa sekusele imizuzu engaphansi kwelitshumi ukuba umdlalo ufike emaphethelweni. Bezingutshiki lobhanqa 1 ka 1 ngalesosikhathi.

Intathelizindaba yezemidlalo uNash Mkokwayarira uthi laye uzibonele ngamehlo abalandeli beqembu le Highlanders bedudulwa kabuhlungu edolobheni lase Zvishavane.

“Umdlalo uthe usumisiwe amapholisa aqhubeke noma esengaphandle etshaya wonke umuntu obegqoke impahla ezimnyama lezimhlophe kanye labakade besezimoteni baze bafika edolobheni lase Zvishavane besithi abafuni muntu edolobheni.

Bafike emavinkilini amakhulu athengisa ukudla batshaya abantu abakade sebezithengela ukudla abantu bagijima okwama khilomitha angafika amahlanu kumbe alitshumi bebaleka behamba ngendlela eqonda koBulawayo,” kutsho uMkokwayarira.

Eyinye njalo intathelizindaba yezemidlalo uMuziwethu Hadebe uthi ukuphoswa kwentuthu ehitshayo kufake labantu abamsulwa engozini.

“Ngibona intuthu ehitshayo isuke yaphazamisa izinto ezinnegi ngoba isuke yahitsha labadlali njengoba iphoswe ngesikhathi abadlali bamaqembu womabili belokhu besenkundleni ndawonye lalabo abakade becindezela lumdlalo ukuba uphume ebulenjini belokhu besathatha imifanekiso yabo.

Lokhu kuba yingozi enkulu kakhulu. Ngibona bekuqakathekile ukuthi kuqale kuvikelwe abadlali lalabo abayabe besemsebenzini. Sike sathwala nzima. Siyihotshile sibili intuthu ehitshayo kodwa siphathisene labanye sasizana,” kutsho uHadebe.

Inhlanganiso ye Premier Soccer League ikhangelelwe ukukhupha isinqumo phezu kwalumdlalo wona omiswe kusele imizuzu eyisithupha ukuba ufike komlindi uyacina.

Eminye imidlalo yesigaba se PSL edlalwe ngempelaviki eyedluleyo iphele kanje;

Cranborne Bullets 1-0 Herentals, Dynamos 1-0 Manica Diamonds, Bulawayo Chiefs 1-0 Whawha, Triangle United 2-1 Caps United, Tenax 1-3 Yadah, Harare City 0-0 Black Rhinos, Chicken Inn 1-0 Bulawayo City kuthi iZPC Kariba 0-1 Ngezi Platinum.

Limpumela itsho ukuba iqembu le Dynamos yilo eliyale lilokhu liphezu kwengalane yemiklomelo lilemiklomelo engamatshumi amabili lesithupha njalo lilingene ngemiklomelo leqembu le Chicken Inn lona elihlezi endaweni yesibili.

Udaba lokuhlukunyezwa kwabalandeli beBosso siluphiwa nguJoseph Njanji
please wait

No media source currently available

0:00 0:03:18 0:00

Facebook Forum

XS
SM
MD
LG