Selikhokhela ngemiklomelo emibili phezu kwengalane yemiklomelo esigabeni saphezulu ese Castle Lager Premier Soccer League iqembu lomdlalo wenguqu ele Dynamos.
Iqembu le Dynamos lilemiklomelo engamatshumi amabili lathoba munwe munye ngemva kokunqoba elikwenze ele Whawha nge 2 ka 1 ngoMgqibelo.
Limpumela itsho ukuba selikhokhela ngemiklomelo emibili ngemva kokuba ele Chicken Inn libe ngutshiki lobhanqa 1 ka 1 lele Highlanders ngeSonto.
Loba kunjalo umqeqetshi weqembu le Chicken Inn uJoey Antipas uthi ulethemba elokuba bazasivala lesosikhala.
“Kusasemasinya kakhulu. Asikafiki laphakathi laphakathi kwesizini. Isicoco asithathathwa phakathi laphakathi kwesizini. Kusaselemidlalo eminengi okumele idlalwe njalo sizaqhubekela phambili silokhu sidlala,” kutsho uAntipas.
Iqembu le Highlanders lona litshelele layahlala endaweni yetshumi lambili engalaneni yemiklomelo, lilemiklomelo elitshumi lanhlanu.
Umqeqetshi we Bosso uMandla Mpofu uthi ukukhala akusizi njalo sebekhangele imidlalo elandelayo.
“Ngakwelinye icele singathi silahle imiklomelo emibili, kwelinye icele sithi sithole umklomelo oqakathekileyo. Bekungumdlalo onzima kakhulu kodwa sikhangelane lomunye njalo umdlalo leqembu esakhelene lalo yikho sesikhangele lowo mdlalo esizawudlala le Bulawayo Chiefs,” kutsho uMpofu.
Iqembu le Bulawayo City linqotshwe nge 1 ka nya ngele Bulawayo Chiefs njalo umqeqetshi walo uPhilani Ncube ubikwa esetshiye lesosikhundla njengokutsho kwakhe ekupheleni komdlalo ngoMgqibelo.
“Akumelanga ngizifake esimeni esinzima. Sengizame konke okusemandleni ami kodwa impumela iyala. Angifuni kusola abadlali kodwa isinqumo engizasithatha ngesami ngedwa,” kutsho uNcube.
Iqembu le Bulawayo City yilo elijeke amanye emsileni lilemiklomelo eyisithupha ngemva kwemidlalo elitshumi lantathu.
Eminye imidlalo edlalwe ngempelaviki eyedluleyo kusigaba se Premier Soccer League iphele kanje;
Iqembu le Ngezi Platinum Stars linqotshwe nge 1 ka nya ngele Harare City, iqembu le Black Rhinos linqobe ele Tenax nge 3 ka 2, iqembu le Herentals linqobe ele FC Platinum nge 1 ka nya, iqembu le Yadah libe ngutshiki lobhanqa 1 ka 1 lele Triangle, iqembu le Manica Diamonds linqobe ele ZPC Kariba nge 1 ka nya, iqembu le Caps United linqotshwe nge 2 ka nya ngele Cranborne Bullets njalo lumdlalo uphuze ukuqala ngoba abadlali beqembu le Caps bebesala ukudlala befuna imali abazikolodwa yinkokheli yeqembu.
