WASHINGTON DC - UMongameli weMelika uMnu Joe Biden sekhethe owesifazana onsundu njalo oyisitabane uKarine Jean-Pierre ukuthi abe yisikhulumeli sesigodlo sakhe, uWhite House press secretary.
UKarine ubengumsekeli wesikhulumeli sesigodlo lesi uJen Psaki, yena ozatshiya lumsebenzi mhlaka 13 kulinyanga.
Lokhu ngokwakuqala embalini yeMelika ukuthi isitabane kumbe umuntu omnyama angene kulesi sikhundla.
UMongameli Biden wathembisa ukufaka abantu abamnyama ezikhundleni eziphezulu kuhulumende wakhe ngesikhathi ekhankasela ukhetho.
Asebafakile ezikhundleni lezi bagoqela umsekeli wakhe uNkosikazi Kamala Harris, yena uKarine Jean-Pierre kanye lomahluli wenkantolo yeSupreme Court uNkosikazi Ketanji Brown Jackson.
Ocubungula ezombusazwe uMnu Tim Muringai utshele iStudio 7 ukuthi ukufaka abantu abansundu ezikhundleni eziphezulu okwenziwa nguBiden kulakho ukutholisa ibandla lakhe usekelo ebantwini abamnyama kukhetho lwamalunga ephalamende ngoLwezi.