amalinks wokungena

Breaking News

Ukhathazekile Umqeqetshi weBosso Ngendawo Elikiyo Engalaneni yePSL


Highlanders Football Club team of 2022

Iqembu le Highlanders lizangena kumdlalo wangeSonto leqembu le Bulawayo Chiefs lihlezi endaweni yetshumi lambili engalaneni yemiklomelo njalo umqeqetshi walo uMpofu uveze ukukhathazeka kakhulu ngalesisimo.

Umqeqetshi weqembu lomdlalo wenguqu ele Highlanders uMandla Mpofu uthi kumele banqobe ngeSonto ukuze umkhankaso wabo wesigabeni se Premier Soccer League ungaqhubeki ungena ihlathi.

Iqembu le Highlanders lizangena kumdlalo wangeSonto leqembu le Bulawayo Chiefs lihlezi endaweni yetshumi lambili engalaneni yemiklomelo njalo umqeqetshi walo uMpofu uveze ukukhathazeka kakhulu ngalesisimo.

“Sikhangelele ukuthi umdlalo lo ngumdlalo omkhulu okumele ulethe untshintsho olukhulu singakahlangani leqembu le Dynamos. Ngumdlalo okumele sinqobe kuwo ngeSonto loma kanjani. Labadlali labo bayakubona njalo bayakuzwisisa ukuba sesilahlekelwe yimiklomelo eminengi njalo sekuyisikhathi ukuthi siqalise ukuyithatha njalo,” kutsho uMpofu.

Ukaputeni weqembu le Highlanders uAriel Sibanda uthi yena labo njengabadlali kumele babophe ziqine ukuze iqembu liphumelele.

“Ngokubona kwami akusiwo mlandu kamqeqetshi sonke sikhathi ngoba nxa sesiphakathi enkundleni yena kulutshwane angakwenza yikho umlandu omkhulu usemahlombe ethu abadlali. Yithi esehluleka ukusebenzisa amathuba esiwatholayo awokuhlohla lokuvikela isango lethu nxa sihlaselwa,” kutsho uSibanda.

Iqembu le Bulawayo Chiefs lona lihlezi endaweni yetshumi engalaneni yemiklomelo njalo umqeqetshi walo uNilton Terroso uthi ukhangelele ukuba kuzadlalwa ngendlela enathisa amanzi ngeSonto.

“Ngiyalihlonipha kakhulu iqembu le Highlanders ngoba liqembu elikhulu kakhulu hatshi koBulawayo kuphela kodwa elizweni lonke. Phezu kwalokho lilabalandeli abalomfutho njalo ngilethemba kuzakuba mnandi enkundleni. Ngikhangelele umdlalo onzima ozakuba ngumhloliso omkhulu kabi kuqembu lethu,” kutsho uTerroso.

Eminye imidlalo eyeviki letshumi lane eyomncintiswano we Castle Lager Premier Soccer League izadlalwa ngokulandelayo.

NgoMgqibelo iqembu le Harare City lizemukela ele Manica Diamonds ngase National Sports Stadium, iqembu le Chicken Inn lizadlala lele Herentals ngase Luveve, iqembu le ZPC Kariba lizadlala lele Whawha ngase Nyamhunga, iqembu le FC Platinum lizadibana lele Caps United ngase Mandava kuthi ele Black Rhinos lizangqikilana lele Ngezi Platinum ngase Sakubva.

NgeSonto iqembu le Tenax lizadlala lele Triangle ngase Sakubva kuthi iqembu elihlezi phezu kwengalane yemiklomelo ele Dynamos lizadibana lele Bulawayo City ngase National Sports Stadium.

Emdlalweni odlalwe namhla enkundleni ye Sakubva iqembu le Yadah linqobe ele Cranborne Bullets nge 1 ka nya.

please wait

No media source currently available

0:00 0:02:20 0:00

Facebook Forum

XS
SM
MD
LG