Ukutshaya indiva ukutshinga okwenziwe ngabasekeli beqembu lakhe umqeqetshi we Highlanders uMandla Mpofu abathi kumele axotshwe umsebenzi ngoba ezehlulekela.
Abasekeli beqembu lomdlalo wenguqu ele Highlanders bakhonone kakhulu besithi uMpofu kahambe ngesikhathi leliqembu likhokhelwa nge 2 ka nya ngele Bulawayo Chiefs emdlalweni obusenkundleni yeBarbourfields ngeSonto emini.
Lumdlalo uthe ufika komlindi uyacina iBosso isilinganisile waphela sekuyi 2 ka 2 njalo uMpofu uthi abalandeli kumele bafunde ukubekezela.
“Ngiyazithemba mina njalo sengibone okukhulu emsebenzini wami lowu owokuqeqetsha. Abantu kumele bafunde isifundo ngokwenziwe liqembu le Real Madrid ukuba imizuzu emibili yisikhathi eside kakhulu. Bonalaba abakade betshinga khathesi nampa sebethabile,” kutsho uMpofu.
Umdlali weqembu le Highlanders uAdrian Silla nguye ohlenge iqembu le Highlanders lomqeqetshi wakhe uMpofu ngokulitshayela emambuleni kabili njalo uthi kumidlalo elandelayo bazakwenza kuhle.
“Bekungekho lula ngoba siqale singathi siphansi kodwa sitshengise ukuzimisela kwethu njengeqembu. Sizaqhubekela phambili lapho esitshiyele khona kulumdlalo. Ngiyakwazi abalandeli sebekhathele ukuzwa lokhu kodwa sibe lokhu sisiba ngutshiki lobhanqa kodwa ngilethemba ukuba sesizaqala ukuthola impumela enhle,” kutsho uSilla.
Impumela yangeSonto itsho ukuba kumidlalo elitshumi lane iqembu le Highlanders selibe ngutshiki lobhanqa kumidlalo eyisikhombisa njalo lihlezi endaweni yetshumi lanye engalaneni yemiklomelo lilemiklomelo elitshumi lesithupha.
NgoMgqibelo umqeqetshi weqembu le Chicken Inn uJoey Antipas usele ezonde egane unwabu ngemva kokuba iqembu lakhe libe ngutshiki lobhanqa 0 ka 0 leqembu le Herentals.
“Okokuqala ngizonde kakhulu ngoba kasidlalanga njengabantu abafuna ukunqoba. Kasizange sikhweze amasokisi umdlalo wonke lalapho sesifake labadlali abatsha abahlanu.
Emdlalweni wenguqu kuqakathekile ukukhuphula izinga nxa ungathola ithuba njalo limpumela itsho ukuba silahle imiklomelo emibili,” kutsho uAntipas.
Iqembu le Chicken Inn lincintisana lele Dynamos phezu kwengalane yemiklomelo njalo lona lilemiklomelo engamatshumi amabili lathoba minwe mbili kuthi ele Dynamos, okuyilo elihlezi phezulu, lilemiklomelo engamatshumi amathathu.
Iqembu le Dynamos lona libe ngutshiki lobhanqa 1 ka 1 lele Bulawayo City njalo minengi imidlalo ephele zingutshiki lobhanqa ngempelaviki eyedluleyo njengoba ele Harare City libe ngutshiki lobhanqa 0 ka 0 lele Manica Diamonds, iqembu le Black Rhinos libe ngutshiki lobhanqa 1 ka 1 lele Ngezi Platinum Stars, kuthi iqembu le Tenax libe ngutshiki lobhanqa 1 ka 1 lele Triangle.
Kweminye imidlalo eyeviki letshumi lane iqembu le FC Platinum libhaxabule ele Caps United nge 3 ka nya kuthi ele ZPC Kariba litshaye ele Whawha nge 1 ka nya.
