Umkhokheli wakwele Russia, uMnu. Vladmir Putin, uthi izenzo ezingaqondanga zomanyano weNorth Atlantic Treaty Organization (NATO) yikho okwenza ahlasele eleUkraine lapho asebhidlize khona amadolobho ambalwa agoqela eleMariupol, Kharkiv lamanye.
I-Associated Press ibika ukuba uPutin wethule lokhu namuhla ngosuku lwesikhumbuzo sokunqoba amaGelimana ayekhokhelwa nguAdolf Hitler empini yesibili iWorld War II.
UPutin uthi wakubona kufanele ukuba ahlasele ilizwe leli ngoba lalikhanya lidlelana leNATO athi yayilungiselela ukuhlasela eleRussia. UPutin wayefuna eleUkraine litshele umhlaba wonke jikelele ukuba kalisoze lingene kumanyano lo.
UMongameli Volodymyr Zelenskyy wakwele Ukraine uthi uPutin ukhuluma amanga aluhlaza tshoko ngoba waqala kudala ukuhlasele ilizwe lakhe, okwenza wahluthuna isabelo seCremea. Uthi kuyayangisa okwenziwa nguPutin othi kulabantu abaselizweni lakwele Ukraine abalengqondo ezifana lalabo ababesekela uHitler.
Uthi namuhla lusuku lokuthakazelela okwenziwa ngokhokho bakhe abehlula uHitler labanye bakhe. UZelenskyy uthibazalinqoba eleRussia empini le, osokubulewe abantu abanengi okumangalisayo kwathi abedlula izigidi ezilitshumi lambili – 12 million babaleka emizini yabo. Inengi labo seliphephele emazweni agoqela elePoland, Romania, Hungary lamanye.
UMnu. Sipho Ngulube, olandela okwenzakale kwele Ukraine, uyakusola kakhulu okwenziwa nguPutin.
Kodwa uMnu. Ngqabutho Mabhena, unobhala jikelele webandla leZimbabwe Community Party, uthi eleUkraine akumelanga lidlelane lamazwe akumanyano weNATO njengalokhu okukhulunywa nguPutin.