WASHINGTON DC - Umthelela womthetho ovimba amabhanga ukukweledisa usuqalile ukutshabalalisa umnotho ngamandla nanku amabhizimusi amanengi esesala ukuthengisela uzulu ngezikwelede.
Amabhizimusi agoqela iFivet, yona ebona ngenhlalakahle yezifuyo leWholesale Beef ethengisa inyama, lamanye atshiyeneyo athi semise inhlelo zokukweledisa abantu ngesizatho sokuthi lawo kasenelisi ukuthatha izikwelede emabhanga.
Inkampani yetshukela iTongaat Hulett layo yethule umbiko ngoLwesine isithi ayisenelisi ukubhadala abalimi ngaphambilini kokuthi bathengise itshukela yabo.
IDairibord Holdings yona ithe ayisoze yenelise ukubhadala abatshale izimali zabo kuyo ngesikhathi esifaneleyo.
Umthetho wokumisa amabhanga ukukweledisa amankampani lozulu zimiswe nguMongameli Emmerson Mnangagwa ngoMgqibelo esithi uzama ukuvimba labo ababoleka izimali babe sebesiyathenga idola leMelika emkambo wensitha, khona athi kubulala umnotho.
Lanxa usibalukhulu weReserve Bank of Zimbabwe (RBZ) uMnu John Mangudya esithi umthetho lo uzaletha ububelo kwezenotho, isikhulumeli senhlanganiso emela abathengi, iNational Consumer Rights Association, uMnu Effie Dlela Ncube uthi sokuvele sobala ukuthi umthetho lo mubi.
