WASHINGTON DC - Ibandla leCitizens Coalition for Change (CCC) lithi usibalukhululu weReserve Bank of Zimbabwe (RBZ), uMnu John Mangudya, lomphathintambo obona ngezemali, uMnu Mthuli Ncube, kumele batshiye umsebenzi kumbe baxotshwe ngoba inhlelo zabo zibulala umnotho.
Lelibandla lithi ukuwa kwedola leZimbabwe ngesilinganiso sokungamatshumi phose amahlanu ekhulwini, 49 percent, nxa liqathaniswa ledola leMelika emkambo kahulumende ngoLwesibili kuveza sobala ukuthi umnotho usebunzimeni obukhulu njalo udinga ukuhlengwa.
Ngeviki edluleyo idola leMelika elilodwa belithengwa ngamadola akuleli alikhulu lamatshumi ayisikhombisa, 173.
Kodwa kusukela ngoLwesibili selithengwa ngamadola eZimbabwe angamakhulu amabili alamatshumi phose ayisithupha, 258.
Emkambo wensitha khona idola leMelika elilodwa selithengwa ngamadola eZimbabwe asukela kwangamakhulu amane, 400, kusiya phezulu.
Umsekeli wesikhulumeli seCCC uMnu Felix Magalela Mafa Sibanda utshele iStudio 7 ukuthi uMangudya loMthuli Ncube kumele bahambe.
Kodwa ilunga leZanu PF uMnu Believe Gaule uthi umnotho welizwe ubulawa yizitha zeZimbabwe lezijeziso zenotho, hatshi uMangudya loNcube.
