WASHINGTON DC - Inhlanganiso emela amankampani agaya impuphu, iGrain Millers Associaton of Zimbabwe (GMAZ), ithi isithenge umumbu ongama-tonne phose ingxenye yesigidi, 400,000, eMalawi lakweleZambia ukuze ilizwe limelane lendlala ekhona lonyaka.
Umgcinisihlalo walinhlanganiso uMnu Tafadzwa Musarara uthi umumbu lo uzaqala ukufika ekupheleni kwenyanga ezayo, kubike iReuters.
EleZimbabwe libhekane lendlala embi ngenxa yokoma komkhathi okwehlise isivuno somumbu lonyaka ngesilinganiso samatshumi amane lantathu, 43 percent.
Ngomnyaka, eleZimbabwe lidla umumbu ongane-2.2 million tonnes, kodwa lonyaka uhulumende uthi ilizwe lizathola ama-tonnes angu1.56 million kuphela.
Ingcwethi zithi okuzakwenza umumo wendlala ube mubi ngamandla lonyaka yikukhuphuka kwentengo yezinto mahlayana lokuwa kwedola leZimbabwe nxa liqathaniswa leleMelika.
Zithi njalo kuzadingeka ukuthi inhlanganiso ezizimeleyo ezifana leWorld Vision kanye leWorld Food Program (WFP) zingenele ngamandla ziphathise abalambayo ngokudla.
