amalinks wokungena

Breaking News

Kulindwe Umqeqetshi Omutsha Kuqembu leHighlanders


Highlanders CEO Ronald Moyo
Highlanders CEO Ronald Moyo

Joseph Njanji

Isiphathamandla seqembu lenguqu ele Highlanders uRonald Moyo uthi akusensuku zatshwala bengethulanga umqeqetshi omutsha ozathatha isikhundla esitshiywe ngu Mandla Mpofu.

UMoyo uthi bathole inqwaba yamaphepha alotshwe yilabo abadinga umsebenzi owokuqeqetsha iqembu le Highlanders njalo sekuseduze ukuba batsho ukuba ngubani ozathatha lesosikhundla.

“Banengi kakhulu abaqeqetshi abafuna ukubuya bezoqeqetsha iqembu le Highlanders. Abanye babo ngabantu esike sasebenza labo ikanti abanye ngabaqalayo kodwa inengi labo ngabadabuka phandle kwelizwe. Silethemba elokuba umdlalo lowu esiwulanda ngoMgqibelo uzakuba ngowokucina lapho intambo eziyabe ziphethwe yilaba ababambe lesosikhundla okwesikhatshana njalo kumdlalo wethu esizawudlala singekhaya leqembu le Harare City sizabe sesilaye umqeqetshi,” kutsho uMoyo.

UJoel Luphahla nguye osele ezibambe esidukwini ngemva kokuxotshwa kuka Mandla Mpofu njalo uthi ukhangelele ukuthi bazathatha yonke yomithathu imiklomelo ngoMgqibelo.

“Yonke into ihamba kuhle akulankinga. Ngikhangelele ukuthi i ZPC siyakubo khonangale njalo kabasoze besiphe imiklomelo emgwanwini kodwa ngengikubone ngesikhathi sizilolonga ngilethemba kubo abafana,” kutsho uLuphahla.

Imvimbi yeqembu le Highlanders uPeter Muduhwa laye uthi amalungiselelo omdlalo wangempelaviki ahambe kuhle kakhulu.

“Indlela ebesilungiselela ngayo kumele sidlale njalo. Konke kulungile kumalungiselelo ethu njalo wonke umdlali uzimisele. Umqeqetshi uMandla laye kumele simdlalele njalo simfisela inhlanhla lapho ayakhona,” kutsho uMuduhwa.

Kweminye imidlalo yesigaba se Premier Soccer League ezadlalwa ngoMgqibelo iqembu le Black Rhinos lizadibana lele Whawha ngase Sakubva, ele Harare City lizadlala lele Bulawayo City ngase National Sports Stadium, iqembu le Chicken Inn lizadlala lele Yadah ngase Luveve, iqembu le FC Platinum lizangqikilana lele Triangle ngase Mandava kuthi ele Ngezi Platinum Stars lizadibana lele Manica Diamonds ngase Baobab.

NgeSonto iqembu le Tenax lizemukela ele Cranborne Bullets ngase Sakubva, iqembu le Dynamos lizadlala lele Herentals ngase National Sports Stadium kuthi iqembu le Bulawayo Chiefs lizadibana lele Caps United ngase Luveve.

XS
SM
MD
LG