amalinks wokungena

Breaking News

Abasakhulayo Bancintisana Emdlalweni weTennis koBulawayo


Tadiwanashe Mauchi

Joseph Njanji

Kulabadlali bomdlalo we-tennis abasakhulayo abaphuma emazweni alitshumi lanhlanu abancintisa kumncintiswano weUnder 18 International Tennis Federation Futures Tournament oqhutshelwa edolobheni lako Bulawayo.

Abenhlanganiso eyeBulawayo Provincial Tennis Board bathi umncintiswano weJ5 Crandid ITF South Central Under 18 tournament upha ithuba abadlali abasakhulayo ukuba bathole imiklomelo ezabenza bayazakale emhlabeni jikelele.

Umgcinisihlalo wale inhlanganiso uRaggs Chikunichawa uchasisa kabanzi ngalumncintiswano.

Raggs Chikunichawa
Raggs Chikunichawa

“Umncintiswano lo ungenwa ngabadlali abaphuma kuwo wonke amagumbi omhlaba njalo wenzelwe ukuba abantwana abadlala umdlalo we tennis bathole imiklomelo ezatshengisa ukuba bakuzinga liphi. Labo abazanqoba bazathola ithuba lokuba kubonakale ukuthi bakuzinga liphi emhlabeni jikelele, ama world rankings,” kutsho uChikunichawa.

Lanyakenye idolobho lako Bulawayo yilo eliqoqe limidlalo njalo uChikunichawa uthi lokhu kuyisibonelo esokuba ikusasa lomdlalo lihle edolobheni leli.

“Amathuba lawa mahle kithi ngoba kusifaka esimeni esokuthi kubonakale ukuba lumdlalo usaphila edolobheni lako Bulawayo njalo uyakhula ikanti labadlali bethu bathola ithuba elokuthola imiklomelo nxa kuyikuthi kabayenelisi ukuya kwamanye amazwe ukuyadlala.

Inengi labo liqhuba kuhle kodwa okuqakathekileyo yikuba bathole ithuba elokudlala labadlali bakwamanye amazwe njalo indlela abadlala ngayo itshengisa ukuba bayazama kakhulu,” kutsho uChikunichawa.

Lumncintiswano ungenwe ngabadlali abaphuma emazweni akuzwekazi lase Africa kanye laphetsheya kolwandle.

Kusenjalo abadlali base Zimbabwe abangamankazana uTadiwanashe Mauchi kanye loTanyaradzwa Midzi basebenzisa limidlalo ukuyaphatheka kumncintiswano we Billie Jean King Cup kucele leEurope/Africa ozaqhutshelwa elizweni leMontenegro kusukela mhla ziyisikhombisa kusiya mhla zilitshumi lanye kunyanga kaNhlangula.

UMauchi, oleminyaka eyokuzalwa elitshumi lane, uthi ukudlala kumncintiswano weBillie Jean King kuyingxenye yokukhula kwakhe kumdlalo we-tennis.

“Angaze ngathanda ukuzihlukumeza ngokufaka umgwazo ngithi ngifuna ukwenza okuthile ekudlaleni kwami loba nje lami ngilazo izifiso zami. Injongo yami lonyaka yikuba ngidlale ngikhuphuke kuluhlu lwabadlali abasakhulayo emhlabeni jikelele njalo ngiphatheke kumncintiswano eyezinga laphezulu,” kutsho uMauchi.

Abanye abayingxenye yeqembu labesifazane elimela ilizwe leZimbabwe emdlalweni we-tennis ndawonye loMauchi loMidzi ngababalisa uMichelle Ncube, uSasha Natalie Chimedza kanye loTsitsi Claire Mahere. UKaputeni waleliqembu nguFadzai Mawisire.

Umncintiswano weBillie Jean King Cup ufana lowe Davies Cup odlalwa ngabesilisa njalo iqembu elimela ilizwe leZimbabwe lincintisa liku Europe/Africa Zone Group III.

Facebook Forum

XS
SM
MD
LG