amalinks wokungena

Breaking News

EleMelika Selifuna Ukuthumezela eleUkraine Izikhali Zohlobo LweMedium Range Missiles


FILE: Kubikwa ukuba izikhali lezi zigoqela okubizwa ngokuthi ngama medium range missiles, aphoswa ayetshaya izitha ezikhatshana okuyisilinganiso samakhilometer afika phose ikhulu – 70 kilometers.

UMongamli Joseph Biden uthi uzanika eleUkraine izikhali zohlobo lwama rockets atshoka umango omude alakho ukuthundubeza okusetshenziswa ngele Russia empini eyaqhamuka ngoMbimbitho lonyaka.

UBiden uthi okwenziwa nguhulumande wakhe akutsho ukuba uselwisana leleRussia.

Abendaba abeAssociated Press babika ukuba uBiden wethule lokhu kuphephandaba leNew York Times ngoLwesibili lapho akubeke sobala ukuba benza lokhu ngenxa yokuthi eleRussia libhomba izibhedlela, indawo eziqakathekileyo ezigoqela ezamasiko lezinye labantu makhaza asebesabalele umhlaba wonke jikelele.

UBiden uthe izikhali ezizanikwa eleUkraine akumelanga zisetshenziswe ukubhomba elizweni leRussia.

Kubikwa ukuba izikhali lezi zigoqela okubizwa ngokuthi ngama medium range missiles, aphoswa ayetshaya izitha ezikhatshana okuyisilinganiso samakhilometer afika phose ikhulu – 70 kilometers.

Umkhokheli wakwele Russia, uMnu. Vladmir Putin, uthi eleMelika lizazisola ngokunika eleUkraine izikhali lezi.

Ocubungula ezomvikela ezimele, uMnu. Mbuso Mhlanga, uthi eleMelika yilo elilwa lele Russia hatshi eleUkraine.

Kusenzakala konke lokhu, bayakhala abantu kuzwekazi leAfrica asebethume uMnu. Macky Sall, okhokhela umanyano wenhlanganiso yeAfrican Union, ukuba ayekhulumisana lenkokheli yakwele Ukraine leleRussia kulandela ukukhuphuka kwentengo yamafathu ezimota, ukusilela kwengqoloyi lokunye.

Abezindaba abeReuters babika ukuba uSall uzakhulumisana loPutin loVolodmyr Zelenskyy ngempi le elakho ukuphehla imvukela emazweni atshiyeneyo.

UMnu. Rejoice Ngwenya, ingcwethi kwezombusazwe, uthi uSall kasoze aguqule imibono kaPutin ngempi le. Uthi impi le isithwalise nzima amazwe amanengi kuzwekazi leAfrica.

Kwehlukene kakhulu okwenziwa ngoBiden lenkokheli yezwekazi leAfrica kwele Ukraine. Akwaziwa ukuba kuyini okuzakwenza uPutin ame ukuhlasela eleUkraine.

Facebook Forum

XS
SM
MD
LG