amalinks wokungena

Breaking News

Iqembu leBosso Lithi Selimtholile Umqeqetshi


Highlanders FC chief executive officer, Ronald Moyo

Joseph Njanji

Inkokheli yeqembu lomdlalo wenguqu ele Highlanders ithi sebemtholile umqeqetshi omutsha ozothatha isikhundla esitshiywe nguMandla Mpofu.

Isiphathamandla seqembu leHighlanders uRonald Moyo uthi umqeqetshi omutsha oweqembu leHighlanders uzethulwa emphakathini kungakafiki ilanga langeSonto lapho iqembu leHighlanders elizadlala khona lele Harare City enkundleni yeBarbourfields.

“Into nje esithanda ukuba siyazise abalandeli yikuba bebekwazi ukuthi kuzakuthi kusiyafika ngeSonto kuzakube kukhona umuntu ohlezi ebhentshini engumqeqetshi kodwa ikakhulu ukuba umqeqetshi sesimtholile njalo sikhangelele ukuba simethule kuzulu kungaba kusasa, kungaba ngoMgqibelo,” kutsho uMoyo.

Umqeqetshi omutsha weqembu leHighlanders uza phambilini kokuba inhlanganiso yePremier Soccer League ikhuphe umbiko othi imidlalo izamiswa okwamaviki amabili njalo ophethe isikhundla sika mqeqetshi weqembu leHighlanders uJoel Luphahla uthi lokhu kuzaphathisa kakhulu.

“Ikhefu leli lize ngesikhathi esihle kakhulu ngoba sikhangelele ukuba abafana laba abangani bayaqhula qhula ukuthi bazaqina kancane ukwenzela ukuthi sithi sesiphenduka babe sebeqinile.

Kuzasincedisa futhi ukuthi nxa kukhona lapho okumele sivale khona izikhala senelise ukudinga okokuvalisa ukuze kuthi nxa sesiphenduka iqembu lethu lingasela izikhala kanye labadlali abaqhulayo,” kutsho uLuphahla.

Iqembu leHighlanders kuyehlula ukuba litshaye eziwayo lonyaka kodwa imvimbi yaleliqembu uPeter Muduhwa uveze ithemba elokuba ngeSonto bazathola imiklomelo emithathu.

“Silungiselele kuhle sibili. Wonke umuntu ulolonga kuhle loba nje kulabanye abalimeleyo kodwa silungiselele kuhle njalo abasekeli bethu kumele sibadlalele ukuze sihambe kukhefu lathi sithole imiklomelo emithathu,” kutsho uMuduhwa.

Imidlalo yesigaba seCastle Lager Premier Soccer League eyeviki letshumi lesikhombisa iyaqala kusasa emini lapho iqembu leYadah elizadlala khona lele Bulawayo Chiefs enkundleni yeNational Sports.

Kumidlalo yangoMgqibelo iqembu leHerentals lizemukela eleZPC Kariba ngase National Sports Stadium, eleBulawayo City lizadlala lele Black Rhinos ngase Barbourfields kuthi ele Cranborne Bullets lizadibana lele FC Platinum ngase Sakubva.

NgeSonto iqembu leCaps United lizangqikilana lele Dynamos ngase National Sports Stadium, iqembu leManica Diamonds lizadlala lele Tenax ngase Sakubva, iqembu leTriangle lizadlala lele Chicken Inn ngase Gibbo kuthi ele Whawha lizangqikilana lele Ngezi Platinum Stars ngase Ascot.

Facebook Forum

XS
SM
MD
LG