Iqembu lomdlalo wenguqu eleHighlanders seliqhatshe umqeqetshi omutsha ovela kwelePortugal, oleminyaka engamatshumi ayisikhombisa eyokuzalwa.
Igama lomqeqetshi omutsha oweqembu leHighlanders nguBaltemar Jose De Oliveira Brito, owazalelwa elizweni leBrazil kodwa usehlale elizweni lePortugal okwesikhathi eside okokuthi usephethe lamaphepha alelolizwe.
Lumqeqetshi uze eZimbabwe ndawonye lomsekeli wakhe uAntonio Joao Martins Leao Torres, yena ophinda abe ngumtoliki wakhe.
UBrito ukutshaye indiva ukungakhulumi kwakhe isingisi ngesikhathi ebuzwa zintatheli zemidlalo ukuba kuzasebenzeka njani labadlali.
“Umdlalo wenguqu uyafana nje umhlaba wonke. Ngilakho njalo ukusebenzisa imifanekiso ukuze ngitshengise abadlali engikufunayo. Banengi abaqeqetshi abazintshantshu abayabe bengakhulumi indimi zalapho abayabe besebenzela khona kodwa bayabe belabantu ababatolikelayo njalo ngilethemba elokuba sizasebenza kuhle,” kutsho uBrito.
Bekulokwesabela ukuba ngeSonto iqembu leBosso lingaba lenkinga, njengoba obephethe isikhundla sikamqeqetshi uJoel Luphahla, engela amaphepha amvumela ukuqeqetsha kusigaba sePremier Soccer League. Unobhala jikelele weqembu leHighlanders uMorgen Dube, uthi bakwenze konke okudingakala ukuba uBrito loTorres bahle baqale umsebenzi.
“Engingakutsho yikuba amadoda lawa alapha nje ngoba amaphepha abo eqondile. Bavele sebeqalisile umsebenzi. Bahle bawuqala nje bengena ehofisini lethu,” kutsho uDube.
Iqembu leHighlanders lizadlala leHarare City ngeSonto enkundleni yeBarbourfields.
UBrito uzalelelwe elizweni laseBrazil wasesiya elizweni lePortugal lapho adlale khona inguqu okweminyaka elitshumi lane.
Ngemva kwalokho uqale ukuqeqetsha njalo usebenze lomqeqetshi olodumo uJose Mourinho kusukela ngo 2000 kwaze kwaba ngu2008 kumaqembu agoqela elePorto kanye leChelsea.
Uza kuqembu leHighlanders ngemva kokuhlala okweminyaka embalwa engaqeqetshi njalo uthi wayemiswe yikuqhamuka komkhuhlane we Covid – 19.
Ucine ukuqeqetsha ekupheleni komnyaka ka2018 lapho akade esebenza eselizweni laseLuxembourg.
Uzaqeqetsha iqembu leHighlanders kuze kuphele umnyaka ka 2023.
Kusenjalo iqembu leBulawayo Chiefs linqobe eleYadah nge 1 ka nya emdlalweni oqhutshelwe enkundleni yeNational Sports namhla emini.
Iqembu leChiefs lihlohlelwe nguFarau Matare njalo liqede umdlalo selilabadlali abayithoba munwe munye enkundleni ngemva kokuba abadlali balo abathi uDavid Bizabani kanye loBen Nyahunzvi betshengiswe ikhasi lombala obomvu.