Amagqwetha amela amalunga ebandla leMthwakazi Republic Party ayisitshiyagalolunye agwetshelwe ukuhlala iminyaka efika emithathu entolongweni athi aseqalisile amalungiselelo okuphikisa lesi isinqumo emthethwandaba ophezulu iviki ezayo ingakapheli.
Umantshi wakoBulawayo uMnu ugwebe abayisikhombisa ukuthi bahlale entolongweni okwenyanga ezingamatshumi amathathu lantathu-33, kwathi ababili ezingamatshumi amathathu lasithupha-36 munye-ngamunye, kucala abaletheswayo elokubangela udlakela ngomnyaka odluleyo koBulawayo bedinga umkhokheli wabo uMnu. Mqondisi Moyo.
Babethoniswa bephandle komthethwandaba kusukela ngomnyaka odluleyo ngoba beku bail kodwa baphinda bavalelwa entolongweni ngeviki edluleyo.
Abagwetshiweyo babalisa oNkosazana Sibongile Banda, Busi Moyo, laboMnumzana Tinos Nkomo, Levison Ncube, Akim Ndebele, Nkosinathi Ncube, Maxwell Nkosi, Mongameli Xukuthwayo Mlotshwa, lo Welcome Moyo.
Bake bavalelwa okwenyanga ezimbalwa ngomnyaka odluleyo enkambeni zeKhami leMlondolozi koBulawayo, njalo abanye babo bathi batshaywa balimala.
Bathi bayahlukuluzwa njalo bakhethwa ngemihlobo zingatsha ezehlukeneyo zikahulumende, banikeza umzekeliso wokuthi bekulamasotsha lamapholisa ahlome aphelela phandle komthethwandaba kamantshi kusethulwa isigwebo sabo.
Omunye wamagqwetha abo, uMnu. Kwanele Mbongeni Nxumalo utshele uSithandekile Mhlanga weStudio 7 ukuthi kunengi okungaqhutshwanga kuhle ngaloludaba.
