amalinks wokungena

Breaking News

Ubeyisibukeli Umqeqetshi Omutsha weBosso


New Highlanders coach Brito

Ubengahlalanga ebhentshini umqeqetshi omutsha oweqembu leHighlanders uBaltemar Jose De Oliveira Brito ngesikhathi leliqembu linqoba eleHarare City nge 1 ka nya namhla emini.

UBrito akazange ahle aphathe iqembu leHighlanders njengalokho okwakhulunywa yinkokheli yaleliqembu ekufikeni kwakhe ngoLwesihlanu kodwa ubebukele ehlezi labalandeli bomdlalo wenguqu.

UJoel Luphahla nguye obeqeqetsha iqembu njalo utshayele ihlombe abafana bakhe ngokunqoba abakwenzileyo.

“Bekungekho lula. Singene emdlalweni lo singani silenkinga ngoba iqembu belinganqobi njalo njengabantu abakade bedlala bengekhaya besifuna ukuba sinikeze abalandeli bethu imiklomelo emithathu abayifunayo.

Ngaphandle kwemiklomelo emithathu ngibona angani ukuletha aboJosta ukuthi badlale kwenze abantu bazibonele nje ukuthi konke lokhu obekusenzakala besilinde ithuba. Ngiyajabula ukuba abafana badlale kuhle,” kutsho uLuphahla.

Intathelizindaba yezemidlalo uNash Mkokwayarira uthi wenze kuhle uBrito ngokungahlali ebhentshini.

“Umqeqetshi omutsha weqembu leHighlanders utshengise ubungcitshi lolwazi lwebhola, ngoba uthe efika wathola iqembu livele seliqeqetshiwe, lilungiselelwa ukuba lidlale, yena wasezinika isikhathi esokuba ahlale phandle abukele, afunde.

Lokhu kutshengisa ukuba ngumuntu owazi afuna ukukwenza njalo ngumuntu ofuna ukuqala abekwazi ukuba uthatha into eminjani,” kutsho uMkokwayarira.

Kweminye imidlalo yesigaba seCastle Lager Premier Soccer League edlalwe namhla iqembu leCaps United linqotshwe nge 3 ka nya ngeleDynamos emdlalweni obusenkundleni ye National Sports Stadium.

Iqembu leWhawha linqobe eleNgezi Platinum nge 1 ka nya emdlalweni obusenkundleni yeAscot.

Iqembu leTriangle linqotshwe nge 1 ka nya ngeleChicken Inn eGibbo kuthi eleManica Diamonds litshaye eleTenax nge 1 ka 0 enkundleni yeSakubva.

NgoMgqibelo iqembu leBulawayo City libe ngutshiki lobhanqa 0 ka 0 leleBlack Rhinos.

EleHerentals lalo libe ngutshiki lobhanqa 0 ka 0 leleZPC Kariba.

Emdlalweni odlalwe ngoLwesihlanu iqembu leYadah linqotshwe nge 1 ka nya ngeleBulawayo Chiefs.

Limpumela itshiye iqembu leChicken Inn kuyilo elihlezi phezu kwengalane lilemiklomelo engamatshumi amathathu lanhlanu ngemva kwemidlalo elitshumi lesikhombisa.

Endaweni yesibili kuleqembu leDynamos elilemiklomelo engamatshumi amathathu lane.

Iqembu leHighlanders lona lihlezi endaweni yetshumi lilemiklomelo engamatshumi amabili.

Imidlalo yesigaba seCastle Lager Premier Soccer League ayisoze ibekhona okwamaviki amabili alandelayo njengoba amaqembu eyabe ehlaba ikhefu.

Facebook Forum

XS
SM
MD
LG