amalinks wokungena

Breaking News

Lokhu Etheleka Amazwi Endunduzo Kumuli YakoMagaisa Evela Emagumbini Amane Womhlaba


Constitutional lawyer Alex Magaisa

U Dr Alex Tawanda Magaisa ubeseleminyaka engamatshumi amane lasithupha ( 46 ) yokuzalwa ngesikhathi ebhubha ngemva kokukhulelwa yisifo senhliziyo.

Aqhubeka esiza amazwi enduduzo kumuli yako Magaisa evelela kwabenhlangothi ezitshiyeneyo zempilo, ngemva kokubhubha kuka Dr Alex Magaisa obeyisikhwicamfundo efundisa ekolitshini lamagqwetha eleKent University njalo wake waba ngomunye wabacebisi wenhloko kahulumende umuyi umnumzana Morgan Tsangirayi ngesikhathi sikahulumende womanyano.

U Dr Alex Tawanda Magaisa ubeseleminyaka engamatshumi amane lasithupha ( 46 ) yokuzalwa ngesikhathi ebhubha ngemva kokukhulelwa yisifo senhliziyo.

Ubikwa waqala ukufundisa eKent Law School ngomnyaka ka 2007 njalo wayefundisa izifundo ezigoqela imithetho enjengePublic Law, Company Law kanye le Contract Law.

Asebenza labo kanye labafundi bakhe esikolweni lesi, labo bethule owabo umbiko wenduduzo bachaza uDr Magaisa njengomuntu owayelesiphiwo kwezokufundisa ezemithetho.

Abenhlanganiso elwela ilungelo lababalisi abafundisa emaphandleni ye Amalgamated Rural Teachers’ Union of Zimbabwe - ARTUZ labo bethule owabo umbiko wenduduzo bechaza umuyi njengomuntu obeyisibonelo esihle sabalwela ilungelo loluntu, engumholi, njalo eyinqgunqguthela yalesi sikhathi esiphila kiso.

Isikhulumeli se ARTUZ, umnumzana Thembakuye Moyo uthi ukubhubha kukaMagaisa kubafice bengalindele.

“U-Magaisa asimkhangelanga thina njenge Politician kodwa. Kodwa simkhangela njengomunye wabantu akade bezinikele njalo beziqinise kakhulu ekulweleni ilungelo lezisebenzi. Nxa sikhangela indlela abekhululeke ngayo ukukhuluma ngokuphathwa kubi kwezisebenzi, ukukubeka mgceke okungahambi kuhle ngokwamalungelo ezisebenzi, sithi thina njengabantu benyama, akukho esingakwenza ngentando kaMdali. ”

Njengabe ARTUZ, uMoyo uthi beqhubekisela phambili imisebenzi emihle uMagaisa akade eyiqhuba wayitshiyele endleleni.

“Esethemba ukuthi thina esiseleyo ikakhulu thina njenge ARTUZ, sokusinikeza umlandu omkhulu ukuthi abanye babalweli bamalungelo ezisebenzi nxa besitshiya kanje, thina njenge ARTUZ sekumele silwe kakhulu ukuze la abalele khona, balale ngokuthula. ”

Kwagcizelelwa langumkhokheli wale nhlanganiso, umnumzana Obert Masarawure yena olandise ngeminye yemisebenzi kaMagaisa.

“ Wasitshiyela isisekelo sombuso sika 2013, siyazi ukuthi waphatheka kakhulu ekulotshweni kwaso sona esilamaBill of Rights, kwaba yinto enhle ukuthi izisebenzi lazo sezilawo amalungelo azo amunyethwe kiso. Siyazi sonke ukuba waphatheka kakhulu endabeni zokuqeda ukungathembekali i-Corruption, indlela ayeveza ngayo imisebenzi emibi kuhlelo lwabalimi lwe Farm Mechanisation Programme.”

Umnumzana Amon Maseko wakoBulawayo laye ngomunye oyincomayo imisebenzi kaMagaisa.

“Yena ubezifaka eqinisweni, ukuthi kuzathiwani ngalokho, ubengakudingi lokho. Ubengumuntu vele owaziwa kakhulu elwela amalungelo, ama-rights abantu abancindezelweyo.”

U-Maseko uchaze njalo uMagaisa njengendoda emadodeni.

“Ubelibeka iqiniso, engayesabi ukuthi kuzathiwani. Ubeyindoda elesibindi ebisebenzisa ukuloba kwayo, kwesinye isikhathi abe yintathelizindaba abhale, asebenzise ithalenta alalo elokubhala.”

Okusekelwe ngumnumzana Raphael Mabhena wakoBulawayo laye ochaze ukubhubha kukaDr Magaisa ngengokulahlekelwa okukhulu kukazulu.

“Ubaba uMagaisa ubengumuntu umela amalungelo abantu jikelele, silahlekelwe kakhulu, kakhulu ngoba ubemela sibili abantu, ekhuluma izinto ezifunwa ngamatitshala engesabi, engafihli umphini. Lamhlanje akasekho, asazi ukuba ngubani ozasivala leso sikhala. Sithi makalale ngoxolo ubaba uMagaisa.”

Ukhangelelwe ukubekwa kweleZimbabwe uDr Magaisa yena obesebenza eseNgilande. Isikhulumeli sabemuli yakhe ngapha ekhaya eZimbabwe uNkosazana Esteri Magaisa uthe khona bezokwethula umbiko phezu kohlelo lokubekwa kwakhe esithi bakhangelele ukukukwenza lokho ngolweSithathu

Facebook Forum

XS
SM
MD
LG