WASHINGTON DC - Ibandla leCitizens Coalition for Change (CCC) lithi livinjwe ukwenza umhlangano wokukhankasela ukhetho ngabasekeli beZanu PF esigabeni sakoMangubo, ePlumtree, ngeSonto.
“Besifisa ukuthi sikhulumisane lezakhamizi mayelana ngebandla lethu elitsha. Izakhamizi bezivele zilomhlangano wazo wesigaba zasezisithi sizathola ithuba lokuthi sikhulumisane lazo," kuchasise isiphathamandla seCCC kulumango, uMnu Mduduzi Tshuma.
“Sithe sisalindele ukuthi sikhulumisane lezakhamizi kwafika ukhansila kaWard 12, uFidzani, ehamba labalwa impi yenkululeko abambalwa.
“Bafike batshayisisa umhlangano lowo bengafuni ukuthi sikhulumisane lezakhamizi, okuyinto engasiphathanga kuhle,” uqhubeke echasisa uTshuma.
Ukhansila waWard 12, uMnu Fidzani Ndlovu, yena ukulandule lokhu esithi “abeCCC yibo ababuya emhlanganweni wezakhamizi sikhuluma ngezentuthuko basebeqala ukwethusela umlimisi njalo bethethisa abantu.”
Ibandla leCCC lithi njalo ummeli weBulilima West ephalamende, olilunga leZanu PF, uMnu Dingumuzi Phuti, laye uke wathumela abantu ukuyaphambanisa umhlangano kaMnu Nelson Chamisa awuqhubele koMadlambudzi kumaviki asanda kwedlula.
Khepha uPhuti ukulandule lokhu esithi abeCCC yibo abaloqalo lodlakela ngoba bake bamethusela “besithi ngingavele ngifike eGwembudzi bazangitshengisa izibunu zenyoka.”
